Presidenti amerikan, Joe Biden, ka arritur në Azi, dhe është zotuar se do t’i kërkojë liderit kinez, Xi Jinping, të frenohet në Korenë e Veriut, kur të takohen në takimin e parë kokë më kokë në samitin e G20-s që mbahet javën e ardhshme.
Biden u takua me liderët e Azisë Juglindore para se të takohet me hologun kinez të hënën në Bali.
Takimi mes dy fuqive vjen pas një sërë testimesh të raketave të kryera nga Koreja e Veriut, që kanë rritur frikën se Phenjani mund të kryejë shpejtë testimin e shtatë bërthamor.
Në takimin me liderin kinez, Biden do t’i thotë atij se Kina – aleatja kryesore e Koresë së Veriut – ka “interes për të luajtur rol konstruktiv që Koreja e Veriut të përmbahet nga tendencat e këqija”, tha për gazetarët këshilltari për Siguri Kombëtare i Shtëpisë së Bardhë, Jake Sullivan.
Biden po ashtu do t’i thotë Xi-së që nëse lëshimet e raketave nga Koreja e Veriut shpeshtohen “kjo do të nënkuptojë prezencë më të fortë ushtarake dhe të sigurisë së ShBA-së në rajon”.
“Koreja e Veriut përfaqëson kërcënim jo vetëm për Shtetet e Bashkuara, jo vetëm për Korenë e Jugut dhe Japoninë, por për paqen dhe stabilitetin në mbarë rajonin”, tha Sullivan.
Përveç me liderin kinez, Biden do të takohet me presidentin e Francës, Emmanuel Macron, para se të niset për samitin e APEC-ut.
Në samitin e G20-s nuk do të marrë pjesë presidenti i Rusisë, Vladimir Putin, i cili është përballur me dënime dhe sanksione nga Perëndimi për shkak të pushtimit të Ukrainës. Në vend të Putinit, Rusinë në këtë samit do ta përfaqësojë ministri i Jashtëm, Sergei Lavrov.
Ndërkaq, presidenti i Ukrainës, Volodymyr Zelensky, pritet të marrë pjesë virtualisht në samitin e G20-s.
