Kryeministri i vendit, Albin Kurti, i shpreh ngushëllime Republikës së Turqisë pas shpërthimit të sotëm vdekjeprurës në Stamboll.
“I shpreh ngushëllimet e mia të përzemërta Republikës së Turqisë pas shpërthimit të sotëm vdekjeprurës në Stamboll. Mendimet dhe lutjet tona janë me familjet e atyre që humbën jetën, ndërsa të plagosurve u uroj shërim të shpejtë”, ka shkruar Kurti në Twitter.
Pas sulmit në Stamboll për të cilin Erdogan tha se i vjen “era terrorizëm”, kanë reaguar edhe liderët në Kosovë.
Kryeparlamentari Glauk Konjufca tha se me trishtim e ka marrë lajmin për vdekjen e disa personave të pafajshëm dhe plagosjen e shumë të tjerëve si pasojë e shpërthimit që ndodhi në Stamboll. E lideri i AAK-së, Ramush Haradinaj thotë se aktet e tilla qyqare na kujtojnë edhe njëherë që bota duhet të jetë bashkë, e demokratizuar dhe e zëshme kundër dhunës dhe terrorit.
Presidenti i Turqisë, Recep Tayyip Erdogan, tha se gjashtë persona janë vrarë dhe 53 janë plagosur në Stamboll më 13 nëntor. Ai tha se shpërthimi ishte “sulm me bombë”, që tha se mund të jetë sulm “terrorist”.
Duke folur për gazetarët para se të nisej për në Indonezi, ku do të marrë pjesë në samitin e G20-s, Erdogan tha se shpërthimi ishte sulm “i pabesë”, duke shtuar se keqbërësit do të ndëshohen.
“Mund të jem gabim nëse e them se jam i sigurt se ky është terror, por sipas shenjave të para…. ka një erë terrori në këtë ngjarje”, tha Erdogan gjatë një konference për media.
“Përpjekja për të sunduar Turqinë dhe popullin e Turqisë përmes terrorizmit nuk do jetë e mundur të arrihet as sot, e as nesër”, shtoi ai.
Sipas liderit turk, katër persona vdiqën në vendin e ngjarjes dhe dy në spital. Edhe 53 persona të tjerë janë plagosur, sipas guvernatorit të Stambollit, Ali Yerlikaya.
Yerlikaya më herët shkroi në Twitter se të plagosurit janë duke marrë trajtim mjekësor. /Kosovatimes/
