Kryebashkiaku i Khersonit, Roman Holovnia, tha se për shkak të mungesës së ujit, ilaçeve dhe bukës, situata humanitare në qytet është jashtëzakonisht e “vështirë”.
“Qyteti vuan mungesën kritike, kryesisht të ujit. Për momentin nuk na mjaftojnë ilaçet, nuk kemi as bukë, nuk e pjekim dot sepse nuk ka energji elektrike”, tha kryebashkiaku.
Forcat e Armatosura të Ukrainës kryen një sulm në një ndërtesë ku ishin vendosur deri në 500 ushtarë rusë, njoftoi Shtabi Kryesor i Forcave të Armatosura të Ukrainës.
“Një goditje me precizion të lartë u krye në një ndërtesë pranë Dnieper ku ishin vendosur deri në 500 ushtarë okupues”, thuhet në njoftim.
Pas sulmit, forcat ruse morën dy kamionë me ushtarë të vdekur në qytetin e Tavrisk.
Rusët bombarduan Nikopolin brenda natës, konfirmoi Valentin Reznichenko, kreu i Administratës Ushtarake të atij rajoni.
“Dy gra të moshës 46 dhe 82 vjeç janë plagosur rëndë, të dyja janë shtruar në spital”, tha ai.
Sipas informacioneve të para, mbi 40 raketa kanë goditur mbrëmë Nikopolin. /Kosovatimes/
