Kryetari i Partisë Demokratike të Kosovës, Memli Krasniqi, po qëndron për vizitë zyrtare në Uashington, ku sot ka takuar profesorin e shquar Daniel Serwer, i cili ëshyë një nga njohësit më të mirë të zhvillimeve politike në Ballkanin Perëndimor.
Në një postim në Facebook, Krasniqi është shprehur se me profesorin Serwer kanë folur për situatën e krijuar në pjesën veriore të vendit dhe nevojën për veprime të përgjegjshme politike.
“Ishte dakordim i përbashkët që, në mesin e agresionit të paprovokuar rus kundër Ukrainës, Kosova duhet të vazhdojë të forcojë raportet me SHBA-të dhe partnerët e tjerë ndërkombëtar. Profesorin Serwer e falënderova për pritjen, këshillat dhe angazhimin shumëvjeçar për të ndihmuar procese të ndryshme në Kosovë”, shkruan Krasniqi.
Aktualisht, kryetari i PDK-së ka nisur një vizitë zyrtare në ShBA, ku sipas paralajmërimeve të kësaj partie, do të ketë takime më zyrtarë të lartë të shtetit amerikan.
Gjithashtu, Krasniqi në vazhdën e vizitës zyrtare në Washtington DC, sot ka zhvilluar takime edhe në Institutin Nacional Demokratik (NDI) dhe Institutin Republikan Ndërkombëtar (IRI).
Krasniqi, në një postim në Facebook i ka vlerësuar këto dy Institute me të cilat PDK bashkëpunon për një kohë të gjatë, si organizatat më të rëndësishme për avancimin e lirisë dhe demokracisë në mbarë botën, përmes asistencës konkrete që u japin partive politike.
“Si Institute të cilat merren shumë me rritjen e rolit qytetar në procesin politik, duke përfshirë gratë dhe të rinjtë, bashkë diskutuam për nismat e fundit të PDK-së që kanë të bëjnë pikërisht me këto dy kategori”, shkruan ai.
Sipas Krasniqit, në këto takime u vlerësua lartë vizioni dhe i PDK-së për barazi të plotë gjinore, 50/50, në të gjitha strukturat e partisë dhe fuqizimi i platformës së rinisë si gjenerator i reformave politike.
“Drejtuesit e këtyre dy Instituteve i falënderova për bashkëpunimin dhe kontributin e çmuar që po vazhdojnë të japin për demokratizimin e shoqërisë tonë në Kosovë”, është shprehur ai.
Lideri i PDK-së dhe i opozitës, Memli Krasniqi gjatë qëndrimit në Washington do të zhvillojë takime me zyrtarë të lartë dhe personalitete me rëndësi në Shtetet e Bashkuara të Amerikës. /Kosovatimes/
