Rezoluta e Parlamentit Evropian mund të pritej duke pasur parasysh kontekstin politik. Pavarësisht se nuk është detyrues, sigurisht që është reflektim i qëndrimit dominues ndaj Serbisë , tha për Danas , Sonja Biserko , kryetare e Komitetit të Helsinkit për të Drejtat e Njeriut .
Parlamenti Evropian dje miratoi një rezolutë ku shprehimisht thuhet se në të ardhmen donacionet dhe paratë duhet t’i dërgohen Serbisë vetëm nëse vendos sanksione ndaj Rusisë.
Serbia as që është e vetëdijshme se refuzimi i saj për të vendosur sanksione ndaj Rusisë ka krijuar një marrëdhënie jo të favorshme ndaj Beogradit, veçanërisht në vende si Polonia dhe vendet baltike. Deri më tani, Beogradi ka llogaritur që aksesi në fondet evropiane të mbetet në fuqi, por me sa duket edhe kjo mund të sfidohet, që do të thotë një humbje prej 200 milionë euro në vit për Serbinë, thotë ajo.Siç vë në dukje Biserko, rezoluta u thotë gjithashtu të gjitha vendeve kandidate se mbi të gjitha pritet përparim në aspektin e shtetit të së drejtës.
– Pritet, gjë që nuk ka ndodhur deri më tani, dhe një mbikëqyrje më e madhe mbi reformat. Veçanërisht interesante është pjesa për ndikimin e palëve të treta në proceset demokratike dhe zgjedhore, thotë ajo dhe shton:
-Ngjarjet aktuale në Serbi dhe rritja e lidhjes me Rusinë krijojnë përshtypjen se është e vështirë të besohet se Serbia do të jetë në gjendje dhe e gatshme të bëjë një ndryshim të tillë në sjelljen e saj dhe vendosmërinë thelbësore për anëtarësim në BE.
Serbia, ashtu si Rusia, i refuzon vlerat evropiane, pikërisht ato që janë theksuar në rezolutë. Serbia, ashtu si Rusia, dëshiron të rishikojë sistemin dhe kufijtë ekzistues, thotë Biserko.
