Autoritetet ukrainase pretendojnë se instruktorët nga Irani që ishin në territoret e aneksuara nga Rusia u vranë nga ushtria ukrainase.
Kështu deklaroi Sekretari i Këshillit të Sigurisë Kombëtare dhe Mbrojtjes së Ukrainës, Oleksiy Danilov në një intervistë për gazetën britanike The Guardian.
Më herët në Kiev, u pretendua se një grup i vogël specialistësh iranianë ishin në Krimenë e aneksuar, duke trajnuar ushtrinë ruse për të trajtuar dronët Shahed-136 të prodhuar nga Irani, të cilët Rusia i përdor për të goditur objektivat në Ukrainë. Për praninë e këshilltarëve iranianë në Krime raportuan edhe përfaqësues të administratës amerikane.
Irani dhe Rusia mohuan furnizimin me dronë dhe praninë e këshilltarëve. Në fillim të nëntorit, kreu i Ministrisë së Jashtme iraniane tha se vendi furnizoi Rusinë me drone, por para fillimit të luftës.
“Ju nuk duhet të jeni aty ku nuk duhet të jeni. Ata ishin në territorin tonë. Ne nuk i ftuam këtu, dhe nëse ata bashkëpunojnë me terroristët dhe marrin pjesë në shkatërrimin e kombit tonë, ne duhet t’i vrasim ata,” tha Danilov. . Ai gjithashtu theksoi se çdo prani ushtarake iraniane në territoret e pushtuara nga Rusia do të konsiderohet nga Ukraina si një objektiv legjitim.
Kur dhe ku, siç pretendon ai, janë vrarë dhe sa prej tyre janë vrarë instruktorët iranianë, Danilov nuk ka saktësuar. Në tetor, radiostacioni izraelit KAN raportoi për vdekjen e 10 këshilltarëve iranianë në luftën në Ukrainë. Sipas saj, kjo ka ndodhur në Krimenë e aneksuar dhe rajonin Kherson.
Më parë, mediat ukrainase i referoheshin Krimesë si vendi ku mund të vendoseshin këshilltarët iranianë. Në të njëjtën kohë, as pala ukrainase dhe as ruse nuk raportuan zyrtarisht ndonjë sulm në Krime, që çoi në vdekjen e njerëzve, qoftë në tetor (nëse përjashtojmë shpërthimin e urës së Krimesë më 8 tetor) ose në nëntor.
