Kreu i Aleancës për Ardhmërinë e Kosovës, Ramush Haradinaj përmes një postimi në Facebook ka shkruar se 29 nëntori është një datë e rëndësishme për të dhe në të njëjtën kohë sipas tij kjo është data e vulosjes së pastërtisë së luftës sonë çlirimtare.
Ai ka shkruar se 10 vite më parë e ka marrë aktvendimin e pafajësisë së tij.
“Lufta për pafajësinë time zgjati po aq sa zgjati lufta për liri. Të dashur qytetarë, sot për mua është një datë e rëndësishme, është përvjetori i lirisë sime, por edhe i vulosjes së pastërtisë së luftës sonë çlirimtare. Edhe pse çlirimtar, luftëtar për liri në tokën time, më 17 nëntor 2004 jam ftuar për herë të parë për intervistim nga Gjykata e Hagës. Që nga ajo ditë e deri më 29 nëntor 2012 ka zgjatur ndjekja ligjore ndaj meje. Edhe pse në aktgjykimin e parë jam liruar si i pafajshëm, pas disa viteve jam ftuar për herë të dytë në rigjykim”, ka shkruar Haradinaj.
Ai ka falënderuar të gjithë ata që nuk e humbën besimin tek ai dhe në pafajësinë e tij, dhe ishin pranë tij në të gjitha mënyrat në këtë betejë ligjore.
