Pranim të fajësisë nga ana e Qeverisë së Kosovës, për rastin e vrasjes së gruas shtatzënë para Klinikës së Gjinekologjisë, kërkon kryetari i Partisë Demokratike të Kosovës, Memli Krasniqi.
Kreu i partisë opozitare deklaron se ky është hapi i parë që duhet të ndërmarrë Qeveria dhe kryeministri Albin Kurti.
“Hapi i parë për të rregulluar diçka është ta pranoni fajin”, shkroi Krasniqi në Facebook.
“Ju vazhdoni të shfajësoheni, duke bërë të gjithë fajtorë, opozitën, shoqërinë, mësuesit, policinë, gjykatësit, mjekët, por asnjëherë, ama asnjëherë, veten dhe ministrat e tu”, deklaroi Krasniqi, duke iu drejtuar Qeverisë së Kosovës.
Ai tha se nuk pret dorëheqje as llogaridhënie nga askush nga Qeveria. “Për të dhënë dorëheqje, duhet të kesh integritet, moral dhe etikë, të jesh i përgjegjshëm e profesional. Ju nuk keni këso profile në kabinetin tuaj. Keq, shumë keq!”, ka shkruar Krasniqi.
Më tej, ai ka kritikuar Kryeministrin Kurti për reagimet lidhur me këtë rast.
“Prej skandalit në skandal! Pas një reagimi jodinjitoz e fyes mbrëmë, Kryeministri sot paska fajësuar tërë shoqërinë për rritjen e dhunës në familje”, u shpreh kryetari i PDK-së.
“Po thotë se kemi pak policë e shumë familje. E para, 18 prej atyre policëve, Kryeministër, i mban vetëm ti personalisht për mbrojtjen tënde, nuk e di se prej kujt po mbrohesh?”.
Kryetari i PDK-së ka shkruar se me këtë lloj qeverisje dhe me këtë trend të ikjes së të rinjve gjatë mandatit të Kurtit, shumë shpejtë Kosova do të ketë përgjysmë më pak familje e përgjysmë më pak policë.
Mes tjerash, ai ka rikujtuar se sot janë bërë 101 ditë pa ministër të Shëndetësisë, duke shtuar se dorasi i dyshuar është ende në arrati. “Ku është reagimi shtetëror? Kush do të merret me të, edhe nëse arrini që ta kapni?”.
Ndërkohë, pas vrasjes së gruas shtatzënë, akt që dyshohet se është kryer nga ish bashkëshorti i saj, edhe deputeti i PDK-së, Mërgim Lushtaku, në reagimin e tij, kërkoi dorëheqje të menjëhershme të ministrit të Punëve të Brendshme, Xhelal Sveçla dhe ministres së Drejtësisë, Albulena Haxhiu.
“Arsyetimi i pandershëm i kryeministrit Kurti, shefit të Xhelalit dhe Albulenës, ku fajtorët sipas tij janë qielli i pistë dhe familjet e Kosovës, paraqet vetëm shmangie nga përgjegjësit e vërtetë, gjeneralizim të problemit dhe justifikim i dështimit hiearkik polici – drejtësi”, deklaroi Lushtaku.
Sipas tij, dështimet e njëpasnjëshme në ofrimin e sigurisë kolektive kanë përgjegjës, kanë emër dhe mbiemër. “Me në krye kryepërgjegjësin – kryefajtorin Kryeminstrin Kurti”.
Një grua shtatzënë është vrarë të mërkurën në mbrëmje në oborrin e Klinikës së Gjinekologjisë në QKUK.
Ajo priste që të enjten të kryente lindjen, por u vra nga një person, që dyshohet se është ish bashkëshorti i saj me të cilin ishin të ndarë.
