Prodhuesi evropian i avionëve Airbus do të braktisë titanin rus brenda pak muajsh. Kjo, sipas Reuters , u bë e ditur nga kreu i divizionit të mbrojtjes dhe hapësirës së Airbus Michael Scholhorn.
“Ne jemi në procesin e ndërprerjes së lidhjeve me Rusinë kur bëhet fjalë për titanin. Kjo është çështje muajsh, jo vitesh,” tha ai, duke vënë në dukje se ky është një proces relativisht i komplikuar, duke përfshirë edhe për shkak të certifikimit të furnizuesve të rinj.
Burime të industrisë i thanë Reuters se Airbus ka filluar të blejë më shumë titan nga SHBA dhe Japonia, por mund të duhen vite për t’i çertifikuar ato sipas standardeve të hapësirës ajrore.
Më herët, prodhuesi amerikan Boeing refuzoi të blinte titan nga Rusia. Kompania shpjegoi se ka rezerva të mjaftueshme të titanit për shkak të grupit të krijuar të furnitorëve në mbarë
botën.Rusia është prodhuesi më i madh i titanit. Përdoret kryesisht në motorët e avionëve dhe pajisjet e uljes për avionët e mëdhenj. Para luftës, kompania ruse VSMPO-Avisma siguronte deri në 35% të të gjitha nevojave për titan për Boeing, 65% për Airbus Group dhe 100% për Embraer, shkruante Kommersant.
Që nga pushtimi rus i Ukrainës, Shtetet e Bashkuara dhe Bashkimi Evropian kanë vendosur tashmë tetë paketa sanksionesh kundër Rusisë. Titani është ende jashtë kufijve. Në prill, CEO i Airbus, Guillaume Faury i kërkoi Perëndimit të mos vendosë një embargo ndaj importeve të titanit rus, pasi mund të dëmtojë industrinë perëndimore më shumë sesa ekonominë ruse.
