Ka ndërruar jetë në moshën 71-vjeçare aktorja amerikane Kirstie Alley. Shkak i vdekjes ishte kanceri, raportojnë fëmijët e aktores në rrjetet e saj sociale.
“Nëna jonë e jashtëzakonshme, e fortë dhe e dashur ndërroi jetë pasi luftoi me një kancer që u diagnostikua vetëm së fundmi”, thanë William True dhe Lilly Parker në një deklaratë.
Kirstie Alley filloi karrierën e saj në vitet 1980 dhe është shfaqur në mbi 70 filma dhe seri televizive. Në vitin 1991, ajo mori një çmim Emmy dhe Golden Globe për aktoren më të mirë në TV për rolin e saj në Cheers.
Ndër veprat e tjera të famshme të aktores janë filmat “Dy: Unë dhe hija ime”, “Kush do të fliste”, “Në varfëri dhe në pasuri”, si dhe serialet “Salloni i Veronikës”, “Veriu dhe Jugu”, ” Scream Queens”.
