Në Prishtinë është mbajtur dëgjim publik për ndryshimin e Projektligjit për Liritë Fetare. Në dëgjimin publik kanë marrë pjesë kryeministri i Republikës së Kosovës, Albin Kurti, kryetari i Kuvendit, Glauk Konjufca, ambasadori amerikan, Jeffrey Hovenier etj.i
Kurti tha se Republika e Kosovës qëndron mjaft mirë sa i përket respektimit të lirisë fetare. Sipas tij, liria fetare zë vend të veçantë, në një shoqëri të lirë dhe të hapur siç është Kosova.
“Një ndër qëllimet e Projektligjit që do të diskutohet sot, është përditësimi i kornizës ligjore për lirinë fetare, për të rritur përputhshmërinë e saj me të drejtat e njeriut dhe liritë themelore të garantuara me Kushtetutën tonë. Përkatësisht, neni 38 i Kushtetutës përcakton se “Liria e besimit, e ndërgjegjes dhe e fesë, është e garantuar”. Dhe, “Liria e besimit, e ndërgjegjes dhe e fesë ngërthen të drejtën për te pranuar dhe për të manifestuar fenë, të drejtën për të shfaqur bindjet personale dhe të drejtën për të pranuar ose refuzuar për të qenë anëtar i një bashkësie ose grupi fetar”, tha Kurti.
Sipas tij edhe Konventa Evropiane për të Drejtat e Njeriut, e cila është drejtpërdrejt e zbatueshme në Republikën e Kosovës, përcakton se, “Çdokush ka të drejtën e lirisë së mendimit, të ndërgjegjes dhe të fesë; kjo e drejtë nënkupton lirinë për të ndryshuar fenë ose besimin dhe lirinë, qoftë individualisht ose kolektivisht, publikisht ose privatisht nëpërmjet kultit, mësimdhënies, praktikave dhe kryerjes së riteve”.
“ Edhe para se të miratohet projektligji në fjalë, Republika e Kosovës edhe tashmë qëndron mjaft mirë për sa i përket respektimit të lirisë fetare. Siç është bërë e ditur para dy muajsh, Kosova renditet e para në rajon për sundimin e ligjit dhe e dyta në botë për përmirësimin më të madh në sundimin e ligjit në vitin 2022, sipas “World Justice Project”. Dhe, një ndër kategoritë në të cilat Kosova ka shënuar performancën më të mirë në vitin 2022, është kategoria e “garantimit efektiv të lirisë së mendimit dhe të fesë””, tha ai.
Sipas Kurtit, Qeveria synon të arrijë një standard sa më të lartë të mbrojtjes së të drejtave të njeriut.
“Liria fetare zë një vend të veçantë në një shoqëri të lirë dhe të hapur siç është Republika e Kosovës. Kjo për dy arsye. Së pari, në një shoqëri të tillë, secili individ arrin të gëzojë lirinë e fjalës dhe të tubimit, si dhe të drejtën për të shprehur dhe për të shkëmbyer mendime të ndryshme. Dhe së dyti, një shoqëri e hapur siç është Kosova, mirëpret brenda kufijve të saj qytetarë nga çdo kënd i botës, edhe si vizitorë afatshkurtër, edhe si banorë afatgjatë”, tha ai.
Duke shtuar se kjo do të thotë se mendime dhe besime të ndryshme vazhdimisht po hyjnë dhe qarkullojnë lirshëm midis qytetarëve tanë tërë kohën.
“Në një vend të tillë të hapur e të lirë, me qarkullim të vazhdueshëm të mendimeve nga brenda dhe nga jashtë, është e pamundur që të gjithë individët të ndajnë të njëjtat bindje fetare. Përkundrazi, diversiteti i bindjeve fetare mes popullatës është i pashmangshëm. Pluralizmi i besimit, siç e kanë vërejtur shumë filozofë politikë, është një fakt i përhershëm dhe i pandryshueshëm i një shoqërie demokratike”, tha ai.
Po ashtu një ndër qëllimet më të rëndësishme të Projektligjit, është qëllimi për të ruajtur dhe për të promovuar këtë pluralizëm fetar.
“Projektligji në fjalë do t’iu ofrojë sa më shumë bashkësive të ndryshme fetare mundësinë për t’u regjistruar zyrtarisht. Në këtë mënyrë, edhe ato bashkësi që janë relativisht të vogla e të reja në Kosovë, do të përfitojnë të drejta të plota dhe të barabarta me ato që janë më të mëdha dhe që kanë një histori më të gjatë mes popullatës sonë. Ndryshimet e propozuara me këtë projektligj, pra, dëshmojnë se Qeveria jonë e merr seriozisht detyrimin jo vetëm për të garantuar respektimin e plotë të lirisë fetare, por edhe për të siguruar, që kjo liri të garantohet në mënyrë të barabartë, për të gjithë qytetarët pa dallim”, tha Kurti, raporton RTKlive.
Kurse kryetari i Kuvendit, Glauk Konjufca, tha se Kosova si vend demokratik i respekton liritë fetare.
“Ne jemi mbledhur këtu për të diskutuar dhe ndryshuar Ligjin për liritë fetare. Ne si popull i Kosovë kemi qenë urë lidhëse mes diversiteteve fetare dhe nuk kemi pasur asnjëherë konflikte të karakterit fetar”, theksoi ai. Konjufca bëri me dije se në bazë të kornizës ligjore, bashkësitë fetare duhet t’i plotësojnë gjashtë kritere.
Edhe ambasadori amerikan, Jeffrey Hovenier, theksoi se kanë nxitur qeverinë e Kosovës që të ndryshojë ligjin për liritë fetare.