UNDP në Kosovë, përmes projektit Përkrahje Përpjekjeve Kundër Korrupsionit në Kosovë (SAEK III), së bashku me partnerë, shënuan Ditën Ndërkombëtare Kundër Korrupsionit.
Ngjarja mblodhi së bashku autoritetet e Kosovës, partnerët zhvillimorë, të rinjtë dhe përfaqësues të shoqërisë civile me qëllim të ndërgjegjësimit kundër korrupsionit. Në këtë ngjarje u shpërndanë çmime për studentët që morën pjesë në një konkurs eseistik me temat e digjitalizimit të shërbimeve publike dhe reduktimit të korrupsionit dhe trajtimit të krizës energjetike, organizuar së bashku me Institutin GAP. Përveç kësaj, u publikua një video e përvojës së praktikantëve në Agjencinë për Parandalimin e Korrupsionit.
Maria Suokko, Përfaqësuesja e Përhershme e UNDP-së theksoi: “Ndërsa shënojmë Ditën Ndërkombëtare Kundër Korrupsionit, ne përpiqemi të nxjerrim në pah se si korrupsioni ndikon në paqen, sigurinë – dhe zhvillimin e qëndrueshëm në përgjithësi – dhe pse është e rëndësishme që të gjithë ne të ndërmarrim veprime në luftën kundër korrupsionit”.
Znj. Suokko falenderoi për bashkëpunimin e shkëlqyer mes UNDP-së dhe partnerëve, veçanërisht përfshirjen e të rinjve dhe shoqërisë civile në luftimin e korrupsionit në sektorin e mjedisit. Ajo konfirmoi angazhimin e UNDP-së për të qenë #TëBashkuarKundërKorrupsionit – motoja e Ditës Ndërkombëtare Kundër Korrupsionit të këtij viti.
Znj. Katherina Stocker, Shefe e Bashkëpunimit në Ambasadën e Zvicrës, theksoi rëndësinë e burimeve natyrore dhe se rrezikohet e ardhmja dhe prosperiteti i rinisë nëse këto burime natyrore nuk përdoren në mënyrë të qëndrueshme dhe nëse mbizotëron korrupsioni.
Sipas saj, korrupsioni dhe keqpërdorimi i burimeve natyrore i plaçkitë qytetarët, komunitetet dhe shoqërinë në tërësi nga të mirat dhe përfitimet publike.
Znj. Nasrin Pourghazian, Shefe e Bashkëpunimit për Zhvillim në Ambasadën e Suedisë, theksoi rëndësinë e të rinjve në ndërtimin e një të ardhmeje të qëndrueshme për të gjithë dhe si politikat e forta ekonomike, mjedisore dhe antikorrupsion sot do të përmirësojnë jetën e të gjithëve në të ardhmen.
“Korrupsioni prekë më së shumti ata që kanë nevoja më së shumti për përkrahje nga burimet publike, përkatësisht gratë, të rinjtë dhe të varfrit. Rrjedhimisht, kjo na motivon edhe më shumë në përpjekjet tona në parandalimin dhe luftimin e korrupsionit” u shpreh Yll Buleshkaj, Drejtor në Agjencinë për Parandalimin e Korrupsionit.
Projekti i UNDP-së Përkrahje Përpjekjeve Kundër Korrupsionit në Kosovë (SAEK III), mbështetet nga Qeveria Zvicerane përmes Zyrës Zvicerane për Bashkëpunim në Kosovë dhe Qeveria Suedeze, përmes SIDA-s në Kosovë. /Kosovatimes/
