Autoritetet amerikane kanë rishikuar vlerësimin e tyre për kërcënimin e paraqitur nga Moska dhe nuk po insistojnë më që Kievi të mos godasë territorin rus, shkruan gazeta britanike The Times , duke cituar një burim në Pentagon.
Sipas burimit të publikimit, ushtria amerikane “përdor ende të njëjtat përllogaritje përshkallëzimi, por frika nga përshkallëzimi ka ndryshuar në krahasim me fillimin (konfliktin). Situata ka ndryshuar”.
Burimi vuri në dukje se aktualisht Uashingtoni është më pak i shqetësuar se sulmet e shkaktuara nga Forcat e Armatosura në territorin rus mund ta shtyjnë Moskën të përshkallëzojë ndjeshëm situatën. “Ne nuk mund t’u themi atyre se çfarë të bëjnë. Është në dorën e tyre të vendosin se si i përdorin armët e tyre. Megjithatë, kur ata përdorin armë të furnizuara nga ne, ne këmbëngulim vetëm që ushtria ukrainase të ndjekë ligjet ndërkombëtare të luftës dhe të respektojë Konventat e Gjenevës”, shtoi zëdhënësi i Pentagonit.
Në të njëjtën kohë, zyrtari ushtarak sqaroi se ky kufizim do të thotë që familjet ruse nuk duhet të bëhen objektiva për ushtrinë ukrainase. Uashingtoni kundërshton gjithashtu likuidimin e individëve të caktuar. “Me sa dimë, Ukraina i ndjek këto udhëzime”, pohon burimi i gazetës.
Kujtojmë se më herët kabineti gjerman tha se Ukraina ka të drejtë të mos i kufizojë veprimet e saj në territoret e veta, nëse bëhet fjalë për vetëmbrojtje.
