Dy persona humbën jetën në një shpërthim në një rafineri nafte në qytetin rus Angarsk në Siberinë juglindore, njoftoi sot departamenti i Komitetit Hetues për Rajonin Irkutsk.
Pesë persona u plagosën nga shpërthimi, tha në Telegram guvernatori i rajonit Irkutsk, Igor Kobzev , transmeton TASS.
Kobzev shtoi se zjarri përfshiu një sipërfaqe prej 2500 metrash katrorë që i përkiste kompanisë petrokimike Angar.Videot në rrjetet sociale tregojnë një zjarr të madh në rafineri, ndërsa mbi të ngrihet tym i zi.
Ministria e Situatave Emergjente njoftoi se zjarri ishte lokalizuar, dhe se shkaku i mundshëm i incidentit ishte ndotja me gaz në sistemin e impiantit të procesit, shtoi RIA Novosti.
Sizmologët thanë se banorët e qytetit të Irkutsk, 45 kilometra në juglindje, dhe qyteteve të tjera aty pranë ndjenë pasgoditje nga shpërthimi, raporton The Moscow Times.
“Shumë e ngatërruan atë për një tërmet,” shkroi guvernatori rajonal Igor Kobzev në Telegram.
Shpërthimi ndodhi më pak se një muaj pasi një zjarr i vogël shpërtheu në rafineri më 27 nëntor, në të cilin askush nuk u lëndua.
