Pas një dite të gjatë, në seancë plenare, parlamentarët e kanë votuar Ligjin për Buxhetin e Republikës për vitin 2023.
Votë për nuk morën amendamentet opozitare, në vazhdimin e seancës për buxhetin, sikurse që votë për nuk pati as për amendamente të propozuara nga Komisionet Parlamentare.
Në kohën kur u votua buxheti, në sallë nuk ishin deputetët e LDK-së e të paktë ishin deputetët nga PDK-ja e AAK-ja, të cilët nuk morën pjesë fare në votim.
Shqyrtimi i Ligjit për Ndarjet Buxhetore vazhdoi pas përfundimit të seancës së jashtëzakonshme, ku u votua që me procedura të përshpejtuara të shqyrtohen javën e ardhshme dy projektligje, ai për Paga dhe për Zyrtarët Publikë. Seanca për buxhetin kishte nisur paradite, por ishte ndërprerë për të vazhduar në orët e pasdites.
Votohet në parim plotësim ndryshimi i Kodit Penal
Pas votimit të Buxhetit të Kosovës, deputetët kanë votuar në parim edhe plotësim ndryshimin e Kodit Penal të Republikës së Kosovës për të cilin kishin përfunduar diskutimet në seancën e kaluar. Ndryshimi i Kodit Penal në parim mori 65 vota të deputetëve.
Ndërkohë, në fund të seancës kryeparlamentari Konjufca i ka njoftuar deputetët e Kuvendit për një propozim të Qeverisë për amendamentim të Kushtetutës së Kosovës.
“Ju njoftoj se Qeveria me 15 dhjetor ka propozuar amendament në Kushtetutën e Republikës, amendamenti numër 27 në kushtetutë. Në nenin 22, pas paragrafit 9, shtohet paragrafi 10, përfshirja e Konventës së Kombeve të Bashkuara për të Drejtat e Personave me Aftësi të Kufizuara”, ka njoftuar kreu i Kuvendit.
Ai tha se amendamenti 27 i plotëson kushtet sipas nenit 144 të Kushtetutës për fillimin e procedurës për amendamentimin e Kushtetutës dhe se i dërgohet Gjykatës Kushtetuese për ta vlerësuar paraprakisht që ndryshimi i propozuar nuk pakëson ndonjë nga të drejtat dhe liritë e përcaktuara në kapitullin 2 të Kushtetutës.
Punimet e Kuvendit janë mbyllur derisa kryeparlamentari tha se për vazhdimin e seancave të mbetura deputetët do të njoftohen me kohë.
Projektligji i Pagave e ai për Zyrtarët Publikë në seancë më 22 dhjetor
Të dyja projektligjet, ai për Pagat dhe për Zyrtarët Publikë do të shqyrtohen më 22 dhjetor, me procedura të përshpejtuara në Kuvendin e Kosovës. Kështu kanë votuar deputetët e shumicës parlamentare, ndonëse këtë formë e kundërshtuan deputetët opozitarë.
Të enjten e javës që vjen, dy projektligje do të jenë në shqyrtim, për të cilat u votua për shmangie nga afatet procedurale.
Kështu, Projektligji për Paga dhe ai për Zyrtarët Publikë do të shqyrtohen të enjten e 22 dhjetorit në seancë plenare, vetëm dy javë pasi morën miratimin në leximin e parë.
Shefja e deputetëve të Vetëvendosjes, Mimoza Kusari-Lila ka treguar arsyet se pse kanë zgjedhur këtë formë shqyrtimi duke shmangur procedurat kuvendare.
Duke ditur rëndësinë që këto Projektligje kanë në rregullimin e marrëdhënies mes të punësuarve dhe shtetit dhe mundësinë e procesimit të pagave sipas kërkesave të vazhdueshme të punëtorëve në sektorin publikë dhe t’i jepet mundësia Thesarit që të përgatitet për realizimin e pagave sipas koeficientëve të rinj për shkurt të vitit 2023, ne si deputet të LVV-së kërkojmë këtë seancë të jashtëzakonshme për të shqyrtuar e miratuar kërkesën për shmangie nga afatet procedurale”, ka sqaruar kërkesën drejtuesja e grupit të deputetëve në pushtet.
Por, kundërshtim të ashpër kishte nga deputetët opozitar.
Bekim Haxhiu nga PDK-ja i ka kërkuar kryetarit të Kuvendit që të ruhet autoriteti i institucionit të Kuvendit duke thënë se nuk duhet të keqpërdoren, sipas tij, numrat në këtë formë.
“Debatin publikë edhe ashtu të vonuar nuk mund ta shuani në vend të vonesës suaj, mosdijes, mashtrimit. Nuk mund kështu të veproni nëse dëshironi ligj të mirë për paga. Nëse doni që të rrëzohet nga Gjykata Kushtetuese mund ta kaloni në propozimin aktual”, tha ai.
Deputeti i LDK-së, Armend Zemaj, ndërkaq tha se propozimi i LVV-së është në kundërshtim me Rregulloren e Kuvendit dhe ua mohon deputetëve të drejtën për të paraqitur amendamente.
“Është komplet në kundërshtim me nenin 76 që flet për shqyrtimin e Projektligjit, sidomos në Komisione. Nuk e dimë pse është kjo nguti, kur javën e kaluar, ka kaluar në procedurë të rregullt e tash kërkohet në aspektin e jashtëzakonshëm të hyhet me procedurë tjetër”, tha ai.
Shefi i deputetëve të AAK-së, Besnik Tahiri ka kërkuar që Projektligji për Zyrtarët Publikë t’i nënshtrohet një debati të thellë publikë.
“Sa i përket projektligjit për Zyrtarët Publikë, ne jemi kundër, do të votojmë kundër dhe kërkojmë që i njëjti t’i nënshtrohet një debati të thellë të diskutimit publik, sepse e dëmton në esencë mandatin e zyrtarëve të lartë publikë”, tha ai.
Pavarësisht kundërshtimeve, propozimet për shmangie nga procedurat kaluan me shumicën e votave të deputetëve dhe të njëjtit do të trajtohen në lexim të dytë, të enjten e javës që vjen.
