Kryeministri i vendit, Albin Kurti, ka bërë një reagim lidhur me vendimin për denimin e Salih Mustafës nga Dhomat e Specializuara derisa e përmendur edhe arrestimin e serbit Sasha Cvjetanit, i cili ishte dënuar për masakrën mbi familjet Bugujevci, Duriqi e Lluglia, ku 16 civilë shqiptarë mbetën të vdekur.
Cvjetani është arrestuar në Athinë të Greqisë, para disa ditësh si pjesë e një karteli të drogës.
Kurti ka thënë se ka mijëra vrasës nga Serbia që kurrë nuk janë dënuar për mizoritë që i kanë bërë në Ballkan.
Ai shtoi se vetëm 26 serbë janë dënuar për 12 mijë të vrarë, dhe mbi 20 mijë të dhunuar seksualisht në Kosovë.
“Masakruesi i familjes Bogujevci, Duriqi e Llugaliu, i cili vrau 16 civilë shqiptarë të papërfshirë në luftë, anëtari i njësitit famkeq që mori pjesë edhe në Masakrën e Srebrenicës “Shkorpjonët’’”.
“Sasha Cvjetani, u pat dënuar me vetëm 20 vite. Ai madje ishte liruar në vitin 2018, 3 vite e gjysmë para përfundimit të dënimit për siç thuhej “sjellje të mirë’’, edhe pse ka vrarë fëmijë që kanë qenë duke fjetur. Sasha Cvjetani ka qenë pjesë e rezervistëve të Serbisë, që u angazhuan për gjenocid në Kroaci, Bosnjë dhe Kosovë. Ndërkohë vetëm dje e kuptuam që ai para ca ditësh është arrestuar në Athinë të Greqisë si pjesë e një karteli të drogës”, ka shkruar Kurti.
“Ndërkohë ka mijëra vrasës nga Serbia që kurrë nuk janë dënuar e as gjykuar për mizoritë që i kanë bërë në Ballkan. Vetëm 26 serbë janë dënuar për mbi 12.000 të vrarë dhe mbi 20.000 të dhunuar seksualisht në Kosovë. I bie që secili prej të dënuarve serbë mesatarisht të ketë vrarë mbi 462 shqiptarë dhe të ketë dhunuar 770 syresh”.
Mes tjerash, Kurti theksoi se ata kanë marrë lëndime më të lehta se ai që iu dha sot Salih Mustafës, i cili ka luftuar për të çliruar vendin e vet.
“E megjithatë ata kanë marrë dënime shumë më të lehta se ai që iu dha sot Salih Mustafës, i cili ka luftuar jo për të pushtuar ndonjë vend tjetër, por për të çliruar vendin e vet”.
“Ky verdikt është indinjues. Cili është mesazhi që i jep ky verdikt ukrainasve që sot luftojnë kundër agresorit?”.
“Mbetem me shpresën se institucionet e pavarura të drejtësisë do ta kuptojnë padrejtësinë dhe do të reflektojnë në shkallët e tjera të gjykimit”.
“Lufta e çdo populli kundër pushtuesve e okupatorëve është e drejtë universale. Është e papranueshme kur çlirimtarin na e gjykojnë më rëndë se agresorin gjenocidal. Sot e gjithmonë jemi solidarë me luftëtarët dhe me UÇK-në tonë”. /Kosovatimes/
