Më 25 dhjetor në orën 12 në Prishtinë do të mbahet aktiviteti humanitar “Vrapo Babadimër”.
Pjesëmarrësit do të vishen me kostume të babagjyshit të Vitit të Ri dhe paratë e mbledhura nga ky aktivitet do të dërgohen për familjet në nevojë dhe fëmijët në repartin e Hemato-onkologjisë.
Këtë e ka bërë të ditur kryetari i kryeqytetit Përparim Rama, përmes një postimi në Facebook.
“Jepi buzëqeshje familjeve në nevojë, bëhu Babadimër. Më 25 dhjetor, duke filluar nga 12:00, ju presim të gjithëve të vrapojmë së bashku me kostume të babadimrit nga sheshi “George Bush” deri te sheshi “Skënderbeu”, për t’u kthyer më pas në pikën e nisjes. Kostumet dhe numrin pjesëmarrës mund t’i blini çdo ditë te sheshi “Zahir Pajaziti” në shtëpizën e “Vrapo Babadimër””, ka shkruar Rama në Facebook.
“Të gjitha mjetet e grumbulluara do të dhurohen për familjet në nevojë dhe fëmijët në repartin e hemato-onkologjisë. Faleminderit Jusuf për ftesën e dhuratën, mezi presim t’i bashkohemi iniciativës”, ka shtuar ai. /Kosovatimes/
