Ministri i Tregtisë së Jashtme dhe Marrëdhënieve Ekonomike të BiH Stasha Kosharac refuzoi të mbështesë konkluzionet e Komunitetit të Energjisë që dënojnë agresionin rus kundër Ukrainës. Gjegjësisht, në mbledhjen e Këshillit Ministror të Komunitetit të Energjisë, ai ka kërkuar që në dokumentin zyrtar të thuhet se Bosnja dhe Hercegovina nuk ka mbështetur pjesë të konkluzioneve që kanë të bëjnë me Federatën Ruse, shkruan “Istraga.ba”.
“Këshilli i Ministrave, me përjashtim të Bosnjës dhe Hercegovinës, dënon fuqishëm luftën e agresionit rus kundër Ukrainës dhe përdorimin e burimeve dhe energjisë për të shantazhuar ekonomitë dhe shoqëritë evropiane, përfshirë palët kontraktuese të Komunitetit të Energjisë. Komuniteti energjetik qëndron në solidaritet të palëkundur me Ukrainën dhe vendet e tjera të prekura drejtpërdrejt nga kjo luftë. Këshilli Ministror shpreh mirënjohjen e tij për mbështetjen e treguar nga donatorët publikë dhe privatë për të ruajtur qëndrueshmërinë e sistemit energjetik të Ukrainës dhe për të ndihmuar popullsinë ukrainase për të kapërcyer vështirësitë gjatë dimrit.
Këshilli i Ministrave falënderon Sekretariatin dhe Komisionin Evropian për lehtësimin e transportit të donacioneve në Ukrainë, për krijimin dhe menaxhimin e Fondit të Ukrainës për Mbështetjen e Energjisë dhe Programin e Shpëtimit të Energjisë të Moldavisë, si dhe për paketën e mbështetjes energjetike për Ballkanin Perëndimor. Këshilli i Ministrave u bën thirrje qeverive në mbarë Evropën dhe partnerëve ndërkombëtarë që të kontribuojnë me donacione financiare në këto mekanizma brenda kapaciteteve të tyre”, thuhet në faqen zyrtare të Komunitetit të Energjisë.
Kujtojmë se seanca e Këshillit Ministror u mbajt më 15 dhjetor dhe u kryesua nga Ministri i Energjisë së Ukrainës , German Galushchenko . Bosnja dhe Hercegovina në këtë takim u përfaqësua nga stafi i SNSD-së dhe ministri i Tregtisë së Jashtme dhe Marrëdhënieve Ekonomike të Bosnjës dhe Hercegovinës, Stasha Kosharac. Përfaqësues te saj kishte edhe Serbia, e cila, ndryshe nga Bosnja dhe Hercegovina, iu bashkua dënimit të agresionit rus.
“Kur morëm presidencën e Komunitetit të Energjisë janarin e kaluar, ne planifikuam të fokusoheshim në objektivat e Marrëveshjes së Gjelbër Evropiane, integrimin e tregut dhe sigurinë dhe solidaritetin energjetik. Lufta dhe terrori energjetik i Rusisë kundër Ukrainës kanë treguar se këto synime janë edhe më të rëndësishme se kurrë më parë. Përkundër të gjitha sfidave, ne si Komunitet arritëm të bëjmë progres në të tre prioritetet kryesore. Jam i sigurt se ky vit i presidencës ukrainase do të mbahet mend si viti në të cilin Evropa arriti pavarësinë nga shantazhet ruse të energjisë”, tha ministri ukrainas, German Galushchenko.
