Ambasadori rus në Serbi Aleksandar Boçan-Kharçenko tha se Serbia mund të mbështetet tek Rusia për situatën në Kosovë dhe vuri në dukje se të dy vendet do të vazhdojnë të koordinojnë qëndrimet e tyre për këtë çështje.
“Njerëzit në Serbi e dinë se gjithmonë mund të mbështeten te Rusia. Pavarësisht nga sfidat serioze për vendin tonë në kontekstin e konfrontimit me NATO-n, që na është imponuar. Ne vazhdojmë të marrim pjesë në zgjidhjen e krizave aktuale ndërkombëtare, duke përfshirë Kosovën”, thuhet në tekstin e publikuar në revistën Internešenel Afers (Çështjet Ndërkombëtare), siç raporton agjencia TASS.
Siç tha Bocan-Kharchenko, Rusia do të vazhdojë bashkëpunimin e ngushtë me Beogradin në mbrojtjen e të “drejtave ligjore” të Serbisë në lidhje me Kosovën.
Sipas diplomatit, instrumenti kryesor i Moskës në këtë çështje është fakti se Rusia është anëtare e përhershme e Këshillit të Sigurimit të Kombeve të Bashkuara.
“Sigurisht, me mirëkuptimin se iniciativa vjen gjithmonë nga Beogradi,” tha Bocan-Harchenko.
Ai tha se Rusia ndan qëndrim për këtë çështje me partnerët e saj kinezë, sepse edhe Pekini insiston në respektimin e rreptë të normave të së drejtës ndërkombëtare dhe mbajtjen e temës së Kosovës në agjendën e Këshillit të Sigurimit të OKB-së.
Diplomati rus ka kujtuar fjalët e presidentit Vladimir Putin se qëndrimi i Rusisë për çështjen e Kosovës nuk ka ndryshuar.
“Ne bëjmë thirrje për një zgjidhje të përhershme të pranueshme reciprokisht midis Beogradit dhe Prishtinës bazuar në ligjin ndërkombëtar dhe rezolutën 1244 të Këshillit të Sigurimit të Kombeve të Bashkuara,” tha Bocan-Harchenko.
Ai shtoi se një zgjidhje e tillë duhet të kënaqë interesat e Beogradit dhe popullit serb dhe të miratohet nga Këshilli i Sigurimit i OKB-së.
