Pas miratimit të Projektligjit të Pagave në lexim të dytë në Kuvendin e Kosovës, disa parti opozitare kanë paralajmëruar se do ta dërgojnë në Gjykatën Kushtetuese.
Ndërkohë, sipas organizatave të ndryshme, nuk janë marrë parasysh komentet e tyre dhe se Ligji i miratuar ka probleme të theksuara kushtetuese që nuk përkon me standardet ndërkombëtare. Ndërkohë, ekspertët thonë se kjo nuk i bën nderë Kuvendit, duke iu drejtuar vazhdimisht Kushtetueses.
Organizata e institute të ndryshme kanë dërguar një numër të madh të komenteve në drejtim të Qeverisë dhe Kuvendit për Projektligjin e Pagave, por që sipas tyre nuk janë marrë parasysh. Gëzim Shala nga Instituti i Kosovës për Drejtësi, tha për Radio Kosovën se procedurat dhe praktikat e ndjekura në drejtim të miratimit të Ligjit të Pagave ishin të këqija, derisa theksoi se Ligji i miratuar ka probleme të theksuara kushtetuese dhe ligjore që nuk përkon me standardet ndërkombëtare.
“Sipas Projektligjit për Pagat, nëpunësit e institucioneve publike nuk kanë siguri juridike, për faktin se po në këtë Ligj nuk është e përcaktuar vlera e koeficientit. Përkundër që parashihet me buxhetin vjetor, kjo i bie që zyrtarët do të jenë në një pasiguri të theksuar. Partitë opozitare si dhe institucionet e pavarura, si Institucioni i Avokatit të Popullit e kanë për detyrim që këtë Ligj ta dërgojnë në Gjykatën Kushtetuese”, ka thënë Shala.
Shala foli edhe për shumë mangësi të tjera në këtë Ligj, ndërsa, theksoi se nëse ai shkon në Gjykatën Kushtetuese, kjo e fundit ka afat 60 ditë që të vendosë për këtë çështje.
Ndërkohë, eksperti i fushës, Safet Gërxhaliu, tha për Radio Kosovën se duhet të ketë një harmonizim të sistemit të pagave, por që duhet të jetë në koordinim me të gjithë akterët relevantë, derisa theksoi se po dëmtohet edhe performanca e Kuvendit, duke dërguar ligje në Gjykatën Kushtetuese.
“Vet fakti që miratohet një ligj dhe nuk dihet koeficienti paraprak, është një hendikep, i cili vërtetë do ta zhvlerësoj vlerën e Ligjit në fjalë. Unë besoj që Ligji duhet të bazohet në dialog, nuk duhet që të paralajmërohet që duhet të shkojë në Gjykatë Kushtetuese, dhe në këtë drejtim duhet të ketë një qëndrim unanim. Kam dronë që partitë opozitare do ta shfrytëzojnë këtë momentum për t’iu adresuar Gjykatës Kushtetuese. Përkundër paralajmërimit që një ligj i tillë mund të fillojë të zbatohet në mars të vitit 2023, do të jetë prapë në sirtarët e Gjykatës Kushtetuese. Në këtë drejtim, vetëm po dëmtohet performanca e Kuvendit dhe institucioneve, sepse nuk i bëhet nderë Kosovës që të kemi gjithmonë ligje që adresën e parë Gjykatën Kushtetuese”, ka thënë Gërxhaliu.
Por, miratimin e Ligjit të Pagave, e kanë mirëpritur sindikatat. Kryetari i Sindikatës së Arsimit, Rrahman Jasharaj, tha për Radio Kosovën, se shqetësim mbetet ende përcaktimi i vlerës së koeficienteve.
“Miratimi i Ligjit në lexim të dytë është një lajm i mirë, ngase kryesisht shumica e propozimeve tona për koeficientet janë përfshirë. Urojmë që së shpejti të dalë edhe vlera e koeficientit që është një shqetësim për të gjithë. Por, jemi të sigurt që Qeveria të dalë me vlerën, e cila do të jetë ajo që do të garantojë ngritje të pagave. Uroj që Ligji të jetë në funksion sa më shpejt”, ka thënë Jasharaj.
Në Projektligjin e Pagave, i miratuar në lexim të dytë nuk përcaktohet vlera monetare e koeficientit, por thuhet se vlera e tij, përcaktohet me Ligjin vjetor të buxhetit. Për këtë dhe disa pika të tjera, partitë opozitare nuk e kanë mbështetur këtë Projektligj, derisa disa prej tyre kanë paralajmëruar se mund ta dërgojnë në Gjykatën Kushtetuese.
Ligji i pagave ishte miratuar një herë në shkurt të vitit 2019. Por, në janar të viti 2020, Avokati i Popullit e pati dërguar atë në Gjykatën Kushtetuese. Gjykata, më pas, konstatoi se ligji i miratuar nuk ishte në përputhje me 11 nene të Kushtetutës dhe se shkaktonte “çrregullim të ndarjes së pushteteve në disfavor të Gjyqësorit dhe institucioneve të pavarura”.
