Shtetet e Bashkuara i bën thirrje presidentit rus, Vladimir Putin, që të pranojë realitetin dhe të tërheqë trupat nga Ukraina, pasi lideri rus më në fund e quajti konfliktin “luftë”.
Që kur Putin ka urdhëruar pushtimin në shkurt, Rusia zyrtarisht i është referuar luftës si “operacion të posaçëm ushtarak” dhe ka miratuar ligje që sanksionojnë përdorimin e fjalës luftë.
Por, gjatë një konference të enjten, Putin përdori fjalën “luftë”, që siç tha, shpreson që të përfundojë sa më shpejt.
“Që nga 24 shkurti, ShBA-ja dhe e gjithë bota e kanë ditur se ‘operacioni i posaçëm ushtarak’ i Putinit ishte luftë e paprovokuar dhe e pajustifikuar ndaj Ukrainës. Më në fund, pas 300 ditësh, Putin e quajti atë siç edhe e ka emrin, luftë”, tha një zëdhënës i Departamentit amerikan të Shtetit më 23 dhjetor.
“Si një hap drejt pranimit të realitetit, ne i bëjmë thirrje atij që t’i japë fund kësaj lufte duke tërhequr forcat nga Ukraina”.
Departamenti amerikan i Shtetit tha se pavarësisht nga terminologjia e përdorur nga Putini, “agresioni i Rusisë kundër fqinjit sovran ka rezultuar në vdekje, shkatërrim dhe zhvendosje”.
“Populli i Ukrainës padyshim që gjen pak ngushëllim në deklaratën e Putinit, që pasqyroi realitetin, sikurse edhe dhjetëra mijëra familje ruse, familjarët e të cilëve janë vrarë duke luftuar për luftën e Putinit”.
Një gjykatë ruse më herët gjatë këtij muaji dënoi politikanin opozitar, Ilya Yashin, me tetë vjet e gjysmë burgim për shkak të “informacioneve të rreme” për luftën. Kjo akuzë u ngrit në bazë të legjislacionit të ri të miratuar nga autoritetet ruse.
Yashin kishte folur për masakrën në Buça, një qytezë afër Kievit, ku u gjetën trupa të civilëve të vrarë, me duar të lidhura pas shpine. Gjetjet në këtë qytezë u bën pas tërheqjes së forcave ruse.
Një ligjvënës opozitar dhe kundërshtar i pushtimit, Nikita Yuferev, tha të premten se do të ndërmarrë veprime ligjore ndaj Putinit për “shpërndarje të lajmeve të rreme” lidhur me referencën e tij për “luftën”.
