Ministri i Jashtëm Wang Yi mbrojti pozicionin e Kinës për luftën në Ukrainë dhe sinjalizoi se ajo do të thellojë lidhjet me Rusinë në vitin e ardhshëm. Refuzimi i Kinës për të dënuar pushtimin e Ukrainës dhe për t’u bashkuar me të tjerët në vendosjen e sanksioneve ndaj Rusisë ka tensionuar më tej lidhjet midis Kinës dhe Perëndimit.
Wang, duke folur me video në një konferencë në kryeqytetin kinez, tha se Kina do të “thellojë besimin e ndërsjellë strategjik dhe bashkëpunimin reciprokisht të dobishëm” me Rusinë, raporton Xinhua. Luftanijet e të dy vendeve zhvilluan stërvitje të përbashkëta detare në Detin e Kinës Lindore javën e kaluar. “Për sa i përket krizës në Ukrainë, ne kemi mbështetur vazhdimisht parimet themelore të objektivitetit dhe paanshmërisë, pa favorizuar njërën apo tjetrën palë, pa i hedhur benzinë zjarrit, aq më pak duke kërkuar përfitime egoiste nga situata”, tha Wang.Wang tha se tregtia dypalëshe me Rusinë po i afrohet objektivit prej 200 miliardë dollarësh “me një ritëm më të shpejtë”, duke shtuar se projekte të mëdha investimi janë duke u zhvilluar. Një zëdhënës kinez fajësoi Shtetet e Bashkuara për përkeqësimin e marrëdhënieve midis dy ekonomive më të mëdha në botë, duke thënë se Uashingtoni ka një “politikë të gabuar” ndaj Kinës.
Wang vlerësoi gjithashtu “përparimet historike” në marrëdhëniet kino-arabe. Gjatë vizitës së fundit të Xi në Riad, ai nënshkroi disa marrëveshje partneriteti strategjik dhe ekonomik dhe tha se Kina do të vazhdojë të importojë sasi të mëdha nafte nga vendet e Gjirit dhe do të zgjerojë importet e gazit natyror të lëngshëm.
