Manjati rus, pronar i një fabrike të famshme salçiçesh, Pavel Antov, u gjet i vdekur në një hotel indian, dy ditë pasi shoku i tij vdiq gjatë të njëjtit udhëtim.
Ata po vizitonin shtetin lindor të Odishës dhe milioneri, i cili ishte gjithashtu një politikan vendas, festoi ditëlindjen e tij në një hotel pikërisht në këtë udhëtim.
Antov ishte një person i njohur në qytetin e Vladimirit, në lindje të Moskës, raporton BBC.
Verën e kaluar, ai mohoi të ketë kritikuar pushtimin rus të Ukrainës pasi një mesazh u shfaq në llogarinë e tij WhatsApp.
Vdekja e milionerit është e fundit në një varg vdekjesh të pashpjegueshme të manjatëve rusë që nga fillimi i pushtimit rus të Ukrainës, shumë prej të cilëve kanë qenë kritikë të hapur të luftës.
Mediat ruse raportojnë se Antov ra nga dritarja e një hoteli në qytetin Rayagada të dielën. Miku i tij që ishte me të në udhëtim, Vladimir Budanov, vdiq të premten në hotel.
Kryeinspektori i policisë së Odishës, Vivekananda Sharma tha se Budanov vdiq pasi pësoi një goditje në tru, ndërsa shoku i tij “ishte në depresion pas vdekjes së tij dhe ai gjithashtu vdiq”.
Konsulli rus në Kalkuta, Alexei Idamkin, i tha agjencisë së lajmeve Tass se policia nuk kishte gjetur asnjë “element kriminal në këto ngjarje tragjike”.
Pavel Antov themeloi fabrikën e përpunimit të mishit Vladimir Standard, dhe në vitin 2019 Forbes vlerësoi pasurinë e tij në rreth 140 milionë dollarë dhe ishte në krye të listës së përfaqësuesve të pasur rusë dhe zyrtarëve qeveritarë.
