Zëvendëskryeministri i Qeverisë së Kosovës, Besnik Bislimi, është optimist se barrikadat në veri po marrin fund. Ai beson se ato do të hiqen sonte ose nesër.
Zëvendësi i Kurtit ka shprehur besimin e tij që qytetarët do të kenë arsye për të festuar.
“Jam shumë optimist se barrikadat do të hiqen sot ose nesër dhe se njerëzit do të kenë arsye për të festuar”, ka thënë Bislimi në një intervistë për Radio Kim.
Ai deklaroi tutje se ka shumë qytetarë të shqetësuar në katër komunat veriore të Kosovës dhe se këto shqetësime po barten edhe te qytetarët në pjesën jugore.
“Besojmë që s’ka asnjë arsye për tensione, s’ka asnjë arsye për barrikada. Nëse ka qytetarë të brengosur lidhur me ngjarje të caktuara, një protestë paqësore mund të arrijë më shumë me më pak përpjekje, sepse qeveria ka vullnet për ta diskutuar cdo problem me qytetarët e Kosovës, pa marrë parasysh nacionalitetin”, ka thënë Bislimi.
Kujtojmë se presidenti i Serbisë, Aleksandar Vuçiq gjendet në Rashkë për takim me serbët që kanë vendosur barrikadat.
