Ndryshimi i masës nga Gjykata Themelore në Prishtinë ndaj ish-policit Dejan Pantiq, nga paraburgimi në arrest shtëpiak ka ngjallur reagime të shumta brenda dhe jashtë vendit. Pantiq, i cili dyshohet për sulm me mjete shpërthyese ndaj zyrave të Komisionit Komunal Zgjedhor në veri është liruar nga paraburgimit, për të vazhduar me masën e arrestit shtëpiak.
Ministrja e Punëve të Jashtme, Donika Gërvalla ka thënë se vendimi i sotëm i gjykatës tregon se “vettingu” është i domosdoshëm.
“Vendimi i sotëm për dërgimin në arrest shtëpiak të personit të dyshuar për terrorizëm shënon një goditje të rëndë për kredibilitetin edhe ashtu shumë të dëmtuar të prokurorisë dhe gjykatave në Kosovë. Prandaj ‘vettingu’ është kaq i domosdoshëm. Të gjithë ata, brenda dhe jashtë vendit, të cilët përpiqen të na bindin se është i panevojshëm, sot kanë marrë përgjigjen përfundimtare. Drejtësi dhe barazi para ligjit, ky është shteti ligjor”, ka theksuar Gërvalla.
E kërkesën dhe vendimin për zëvendësimin e masës ndaj Dejan Pantiqit, ministrja e Drejtësisë, Albulena Haxhiu e ka vlerësuar si “aktin më të rëndë që mund t’i bëhej vendit nga institucionet që do të duhej të ishin shembulli më i mirë i mbrojtjes së qytetarëve dhe rendit tonë kushtetues”.
“Nuk di si ta kuptoj dhe si është e mundshme që dikush që akuzohet për një vepër aq të rëndë që ka të bëj me terrorizëm, të shkoj në arrest shtëpiak, madje sipas legjislacionit, për shkak të peshës së rëndë të veprës penale, nuk mund të shqiptohet një masë e butë sikur ajo e arrestit shtëpiak”, ka shkruar Haxhiu në Facebook.
Ajo tutje ka thënë se nuk kanë ëndërruar që “sistemi i drejtësisë do të çlirohet pa reformën në drejtësi por ama të ndodhë edhe kjo që ndodhi sot është e papranueshme dhe diçka që do të ngelet në historinë moderne të Kosovës”.
“Në vend se institucionet e drejtësisë të mbronin rendin kushtetues e qytetarët, njësoj sikur po angazhohet policia edhe fizikisht në veriun e vendit tonë, këta prej zyrave të tyre marrin vendime aq të dëmshme e të cilat përveç tjerash janë inkurajim për bandat kriminale e terroriste në veriun e vendit tonë”, ka shkruar tutje ministrja e Drejtësisë.
Ndërkaq, raportuesja për Kosovën, Viola von Cramon, ka mirëpritur vendimin e gjykatës për dërgimin e ish-policit Dejan Pantiq në arrest shtëpiak. Ajo përmes një postimi në Twitter, ka thënë se kjo duhet të çojë në heqje të menjëhershme të barrikadave në veri.
“E mirëpres me ngrohtësi vendimin e gjykatës për dërgimin e Dejan Pantiqit, polic të Kosovës, në arrest shtëpiak. Kjo duhet të çojë në heqjen e menjëhershme të barrikadave në veri të Kosovës dhe depërshkallëzim të plotë. Mbështetje e plotë për EULEX-in dhe KFOR-in për mbikëqyrjen e tyre”, ka shkruar Cramon në Twitter.
Ka reaguar edhe deputeti i Lëvizjes Vetëvendosje, Haki Abazi, sipas të cilit reformimi i qeverisë dhe reformimi i gjyqësorit është imperativ urgjent dhe prioritet. “Ka rëndësi veprimi jo deklarimi dhe frazat. Reformimi i qeverisë dhe reformimi i gjyqësorit është imperativ urgjent dhe prioritet. Lëshimi i Pantiqit në arrest shtëpiak është dështim i gjithë zinxhirit institucional. Nuk bëhet shteti me njerëz që kanë privatizuar e kanë kriminalizuar sektorët vital në të kaluarën. Ne kemi marrë besimin për ndryshim dhe jo tolerim të avazit të vjetër”, tha Abazi.
Zyrtari i lartë i PDK-së, Betim Gjoshi ka thënë se Albin Kurti, Vjosa Osmani dhe Xhelal Sveçla janë personat fajtorë për mungesën e sovranitetit në katër komunat veriore të Kosovës. ”Një herë dështuan t’i mbajnë zgjedhjet, e sot paskan dështuar zyrtarisht segmentin tjetër të shtetit, duke e liruar një të dyshuar për terrorizëm. Po-po, lirim është! Mos u fshehni pas termave dhe procedurave ligjore” ka shkruar ai.
E zëdhënësi i VV-së, Arlind Manxhuka e ka quajtur akt tradhtie vendimin për ndryshimin e masës së sigurisë ndaj ish-policit Dejan Pantiq dhe dërgimin e tij në arrest shtëpiak. “Ky aktlirim është akttradhëti”, ka shkruar Manxhuka në Facebook.
