Një 31-vjeçar nga Kukësi ka humbur jetën në orët e para të mëngjesit të kësaj të marte në Prizren. Bëhet me dije se ngjarja është regjistruar në një lokal nate në dalje të Prizrenit, ku 31-vjeçari me inicialet V.C dhe shokët e tij, R.Sh dhe A.B janë konfliktuar me një shqiptar të Kosovës, Dibran Hoxhaj pronari i lokalit të “Cobra City” në Prizren.
Ndërkohë bëhet me dije se të rinjtë nga Kukësi nuk kanë pasur armë me vete, dhe janë qëlluar me armë ndërsa kanë qenë duke u larguar. Policia ka sqaruar në lokal ka ndodhur konflikit fizik dhe përplasja me armë ka ndodhur në dalje të Prizrenit.
Pas konfliktit, 31-vjeçari dhe 2 shokët e tij kanë tentuar të largohen me makinë, por shtetasi D.H. ka qëlluar me armë zjarri në drejtim të automjetit të tyre, ku për pasojë mbetën të plagosur 31-vjeçari dhe shoku i tij me inicialet R.Sh.
Pas ngjarjes, 3 të rinjtë u nisën drejt pikës kufitare të Morinës ku treguan se si ndodhi gjithçka, ndërsa të plagosurit u dërguan në Spitalin e Kukësit, por 31-vjeçari nuk mundi t’i mbijetojë plagëve të marra.
Grupi hetimor vijon veprimet procedurale për llogari të Policisë së Kosovës, për zbardhjen e plotë të rrethanave të ngjarjes.
Njoftimi i Policisë:
Në Morinë, rreth orës 04:25, të mëngjesit, kanë hyrë për në drejtim të spitalit rajonal të Kukësit, shtetasit V. C., 31 vjec, dhe R. Sh., 27 vjeç, që transportoheshin me automjet nga shtetasi A . B., të tre nga Kukësi, ku shtetasit V. C., dhe R. SH , ishin të plagosur me armë zjarri në Prizren të Kosovës.
Si pasojë e plagëve të marra shtetasi V. C., ka ndërruar jetë gjatë rrugës, ndërsa shtetasi R. Sh., ndodhet në spital nën kujdesin e mjekëve.
Në lidhjen me ngjarjen, menjëherë nga DVP Kukës është ngritur grupi hetimor i cili po kryen veprimet procedurale për llogari të Policisë së Kosovës.
Nga deklarimet e para të shtetasit të plagosur dhe shtetasit A. B., që i ka transportuar për në spital, dyshohet se ngjarja ka ndodhur në dalje të Prizrenit, ku pas një konflikti në një lokal nate me disa shtetas kosovar.
Në momentin që shtetasit V.C., R.Sh dhe A.B, po largoheshin me automjet, dyshohet se shtetasi D. H, ka qëlluar me armë zjarri në drejtim të automjetit të tyre.
Në lidhje me ngjarjen është komunikuar me Policinë kosovare dhe vijon shkëmbimi i informacionit.
Grupi hetimor vijon veprimet procedurale për llogari të Policisë së Kosovës, për zbardhjen e plotë të rrethanave të ngjarjes.
