Turqia dhe Bullgaria nënshkruan sot një marrëveshje për transferimin e deri në 1.5 miliardë metra kub gaz natyror në vit, raporton Anadolu Agency (AA).
“Kontrata e re mbulon një periudhë 13 vjeçare,” tha ministri turk i Energjisë dhe Burimeve Natyrore Fatih Donmez në Sofje, ku u prit nga homologu i tij bullgar Rossen Hristov.
Donmez shtoi se një bashkëpunim i tillë do të kontribuojë shumë në sigurinë e furnizimit me gaz natyror në Evropë, së bashku me Bullgarinë.
Marrëveshja e gazit mes dy vendeve u nënshkrua nga drejtorët e përgjithshëm të Kompanisë Turke të Naftës dhe Gazit (BOTAS) dhe Bulgargaz.
Marrëveshja vjen një muaj pas një takimi të krerëve dhe ministrave të energjisë në Stamboll.
“Ne jemi të kënaqur që temat e diskutuara në Stamboll u shndërruan në hapa konkretë sot në Sofje, më pak se një muaj pas takimit tonë të fundit,” tha Donmez.
