Përmes strategjisë për parandalimin e ekstremizmit të dhunshëm dhe radikalizmit që shpie në terrorizëm, ministria, qeveria dhe Bashkësia Islame e Kosovës po përpiqen të kontrollojnë literaturën religjioze që futet në burgje. Megjithatë zyrtarët thonë se deradikalizmi i të burgosurve, mbetet një betejë e vështirë.
Duke përdorur ligjërimet nëpër xhami dhe duke kontrolluar literaturën religjioze, Bashkësia Islame përmes departamentit të saj të grave dhe atij për të rinj, po udhëheq një fushatë afatgjate vetëdijesuese kundër radikalizmit fetar.
Në bashkëpunim me Ministrinë e Arsimit, Bashkësia Islame po përpiqet të bëjë një kontroll sidomos të literaturës që futet nëpër burgje te personat e akuzuar për vepra të ndryshme të ekstremizmit, urrejtjes fetare dhe elementeve të tjera.
Fitim Flugaj, nga Bashkësia Islame e Kosovës, thotë për Radio Kosovën se në zemër të luftës kundër radikalizmit fetar është pastrimi i literaturës nëpër burgje.
Ai tha se bazuar në kërkesën e Ministrisë së Drejtësisë, asnjë lloj materiali me përmbajte religjioze nuk mund të hyjë në burgje pa aprovimin e Bashkësisë Islame.
“Si Bashkësi Islame menjëherë kemi dërguar literaturë të mjaftueshme nëpër burgje dhe kemi pasuruar bibliotekat e burgjeve. Çdo literaturë që vjen për burgjet, në fillim kontrollohet dhe vuloset nga Bashkësia Islame”, deklaroi Flugaj.
Zyrtarët në Kosovë po zbatojnë një strategji të ri-integrimit të personave të dënuar për vepra të ndryshme penale që ndërlidhen me ekstremizmin fetar dhe bashkimin me grupe terroriste jashtë Kosovës. Megjithatë sipas autoriteteve që po punojnë në këtë fushë deradikalizimi i të burgosurve, mbetet një proces i vështirë.
Bekim Gashi, udhëheqës i Njësisë së inteligjencës korrektuese në Shërbimin Korrektues të Kosovës, thotë se në tri vitet e fundit 56 ish të burgosur për vepra të ndryshme ekstremizmi dhe terrorizmi kanë kaluar nëpër programet rehabilituese.
“Për momentin asnjë nuk është kthyer si recidivist. Kemi shumë sfida dhe kemi nevojë për ndihmë. Kisha me thënë se nuk kemi strategji se si ta bëjmë shkëputjen e radikalizmit te të burgosurit”, tha Ggashi.
Bashkësia Islame e Kosovës këmbëngul që një prej mjeteve më efikase në luftën kundër ekstremizmit fetar është përfshirja e edukatës fetare si lëndë nëpër shkolla, duke theksuar se kjo e mundëson kontrollin mbi literaturën.
Megjithatë, draft-ligji mbi rregullimin e pozitës juridike të bashkësive nuk e përfshin edukatën fetare në shkolla, dhe për më shumë se një dekadë parlamenti i vendit ka dështuar të miratojë këtë projektligj, që ofron një kornizë që ua jep komuniteteve fetare statusin ligjor.
