Turqia i dorëzoi Ukrainës municionet thërrmuese të artilerisë në fund të vitit të kaluar. Këtë e bën të ditur revista Foreign Policy, duke cituar zyrtarë amerikanë dhe evropianë. Sipas botimit, më parë Kievi u përpoq pa sukses të merrte furnizime të tilla nga Shtetet e Bashkuara.
Fjala është për municione të avancuara konvencionale me qëllime të dyfishta (Dual-Purpose Improved Conventional Munitions, DPICM), të cilat janë prodhuar në Turqi sipas një marrëveshjeje me Shtetet e Bashkuara të Amerikës gjatë Luftës së Ftohtë, shkruan gazeta. Ato janë krijuar për të shkatërruar automjete të blinduara – kur qëllohen, secila prej tyre shpërndahet në 88 municione më të vogla.
Armët thërrmuese janë të ndaluara nga një konventë ndërkombëtare e miratuar në vitin 2010, por Ukraina, Turqia, Shtetet e Bashkuara dhe Rusia nuk i janë bashkuar asaj.
Sipas burimeve të botimit, Ankaraja ka disa muaj që po përpiqet të fshehë transferimin e municioneve thërrmuese në Kiev. Pasi SHBA ia mohuan Ukrainës aksesin ndaj tyre, Turqia u bë i vetmi vend ku Kievi mund t’i merrte ato. Ligjet amerikane ndalojnë eksportin e DPICM për shkak të përqindjes së lartë të municioneve jo-eksplozive, të cilat mund të përbëjnë rrezik për civilët për shumë vite në vijim.
Gazetarët raportojnë se dërgesa e municioneve filloi në nëntor, por ende nuk është e qartë nëse ato përdoren tashmë në fushën e betejës.
“Kjo tregon se Turqia, edhe pse përpiqet të kënaqë Rusinë në disa aspekte, po i ofron Ukrainës mbështetje shumë të rëndësishme ushtarake,” tha një burim për botimin.
Ambasada turke në Uashington dhe Ministria e Mbrojtjes e Ukrainës nuk iu përgjigjën kërkesave të Foreign Policy për koment mbi dërgesat e municioneve thërrmuese.
Sipas organizatave të të drejtave të njeriut, ushtria ruse përdori në mënyrë të përsëritur municione thërrmuese në sulmin e saj ndaj Ukrainës, gjë që rezultoi në viktima të konsiderueshme, duke përfshirë edhe në mesin e popullatës civile. Sipas një raporti të Human Rigths Watch, Ukraina përdorte gjithashtu këtë lloj municioni, por Rusia e përdorte atë më shpesh, duke përfshirë edhe kundër objektivave civilë (Ministria ruse e Mbrojtjes e mohon këtë të fundit). Raporti i Amnesty International i referohet vdekjes së qindra banorëve të Kharkiv nga municione të tilla.
