Një ngjarje e rëndë ka ndodhur në orët e para të mëngjesit në Shkodër, ku i është vendosur tritol banesës së një efektivi të policisë.
Rreth orës 03:50, në lagjen Dobraç, ka shpërthyer një sasi lënde plasëse, përpara banesës së shtetasit Pëllumb Shpati, me detyrë shef i Seksionit për Hetimin e Krimeve, në Komisariatin e Policisë Shkodër.
Si pasojë janë shkaktuar dëmtime të lehta në banesën e tij, si dhe është dëmtuar automjeti i tij.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve.
Gjergj Shpati ka rrëfyer ngjarjen e ndodhur në orët e para të mëngjesit të sotëm në Shkodër, ku iu vendos eksploziv banesës së shefit të krimeve Pëllumb Shpati.
“Ka ndodhur ne oren 4 te mengjesit. Ishim gjithe ne gjume. Ishte shpërthim i fuqishem. Mendoj se ka ardhur per shkak te detyres te djalit. Probleme me kend nuk kemi patur. I kerkoj shtetit qe te beje detyren dhe ta zbardhë. Kemi qene 17 vete brenda shtepise, 3 familje nga kati i pare ne te tretin”, deklaroi Gjergj Shpati, babai i shefit të Krimeve Shkodër.
