Kryetari i Partisë Demokratike të Kosovës, Memli Krasniqi me bashkëpunëtorët e tij ka bërë homazhe te Kompleksi Memorial në Reçak, duke përkujtuar 24 vjetorin e masakrës që shokoi botën demokratike. Ai tha se masakra e Reçakut, dëshmoi qëllimin dhe synimin e një politike gjenocidale dhe të orkestruar të Serbisë kundër shqiptarëve në Kosovë.
“Vrasja e 45 civilëve në Reçak, në gjakftohtësi dhe me paramendim, ishte krim kundër njerëzimit, çka me të drejtë e cilësoi edhe Ambasadori William Walker”, ka shkruar ai në rrjetin social facebbok.
Krimet ndaj popullatës civile shqiptare, gjatë luftës së viteve 1998/99, sipas tij, nuk do të harrohen asnjëherë. “Për to nuk do të heshtim derisa drejtësia të vihet në vend”, ka shkruar kryetari i PDK-së.
