Konkursi për rekrutimin e policëve të rinj nga radhët e komuniteteve që do të punojnë në veri të Kosovës mund të dështojë, si pasojë e numri të vogël të aplikantëve. Kështu vlerësojnë ekspertë të sigurisë, sipas të cilëve, shteti serb po bënë presion ndaj të interesuarve për aplikim. Ka nga ta që thonë se arritja e një marrëveshjeje mund të ndihmonte në zëvendësimin me sukses të policëve serbë që dhanë dorëheqje.
Kanë mbetur vetëm edhe 10 ditë kohë deri në mbylljen e konkursit për rekrutimin e policëve të rinj nga radhët e komuniteteve, të cilët do të angazhohen në katër komunat në veri të vendit. Radio Kosova ka pyetur Policinë se sa është numri i përgjithshëm dhe sipas përkatësisë etnike i atyre që kane aplikuar për policë të rinj. Nga Policia, nuk kanë treguar numrin e aplikantëve. “Siç jeni të informuar konkursi është hapur, ndërsa për sa i përket procesit/çështjeve të mëtejme, do të informoheni me kohë sipas planifikimeve/fazave që parashihen”, kanë thënë nga Policia.
Marrë parasysh zhvillimet në veri, numri i aplikuesve mund të jetë i vogël, vlerësojnë ekspertë të sigurisë. I një mendimi të tillë është edhe eksperti Nuredin Ibishi, teksa flet për rekrutimin e policëve të rinj.
“Ata po kanë kërcënime të vazhdueshme për kyçje në Policinë e Kosovës. Mendoj se duhet të jetë një marrëveshje politike, me qëllim të rekrutimit të policëve të rinj, çfarë është mjaft e vështirë në këtë situatë që po mbretëron nga trysnia e shërbimit të inteligjencës, por edhe ekstremistëve serbë”, tha Ibishi.
Eksperti tjetër i sigurisë, Fadi Kajtazi, po ashtu thotë se procesi i rekrutimit të policëve të rinj serbë do të jetë i vështirë, pasi ish policët dhanë dorëheqje për qëllime politike.
“Deri në momentin që kërkesat politike të serbëve nuk marrin një rrugë të zgjidhjes, jo vetëm problemi i rekrutimit të policëve, por edhe i integrimit të serbëve të veriut në jetën institucionale të Kosovës do të jetë i vështirë. Jo pse serbët e pjesës veriore nuk dëshirojnë të integrohen në jetën shtetërore të Kosovës, por nga presioni që shteti serb është duke ua bërë atyre”, tha ai.
Presioni dhe kërcënimet nga shteti serb që mund t’ua bëjë të interesuarve për aplikim, mund të bëjnë që konkursi të dështojë, thotë eksperti Drizan Shala, sipas të cilit, kjo mund të diskutohet edhe në Bruksel.
“Sipas gjitha gjasave çështja e konkursit të Policisë së Kosovës, do të përfundojë si temë bisedimi në Bruksel, ku do të ketë një zgjidhje optimale që shteti i Serbisë të largohet nga trysnia dhe presioni dhe kështu qytetarët serbë do ta kenë më të lehtë të aplikojnë”, tha ai.
Konkursi për rekrutimin e policëve të rinj nga radhët e komuniteteve u hap më 5 janar, pas dorëheqjeve masive të policëve paraprakë serbë në fillim të muajit nëntor, do të jetë i hapur deri më 26 janar./Kosovatimes/
