Gjatë vitit 2022, Ministria e Arsimit ka mbështetur me bursa studentët që studiojnë në universitetet më prestigjioze në botë, ato në Kosovë si dhe që studiojnë në fushat e Shkencës, Teknologjisë, Inxhinierisë dhe Matematikës.
Njohësit e fushës së arsimit thonë se skema të tilla për bursa kontribuojnë në mirëqenien e të rinjve.
Si motivim për studentët që studiojnë në universitetet publike në Kosovë, janë paraparë bursa rreth 1 milion euro për studentët më të mirë, ndërsa mbështetje financiare ka pasur edhe për vajzat që studiojnë në fushat e Shkencës, Teknologjisë, Inxhinierisë dhe Matematikës.
Ministrja e Arsimit, Arbërie Nagavci, ka bërë të ditur për Radio Kosovën se kanë qenë rreth 1 mijë e 400 vajza që i kanë plotësuar kriteret, ndërsa janë ndarë bursa në vlerë prej dy milionë eurosh për to.
“Sivjet e kemi rritur buxhetin për dy milionë euro dhe për vitin e dytë e të tretë nuk kemi përjashtuar edhe djemtë që janë duke studiuar në këto fusha. Kjo, sepse gjithandej në botë mbështeten të rinjtë që studiojnë në fushat STEM, për shkak të mundësive të shumta që ofrohen për zhvillimin e vendeve.., tha Nagvaci.
E para e arsimit gjithashtu theksoi se Ministria e Arsimit ka mbështetur me bursa edhe studentët që studiojnë në universitetet më prestigjioze në botë.
“Ka qenë një praktikë që e kemi filluar vjet. Jo gjithmonë kjo shumë u ka mjaftuar. Jemi të vetëdijshëm që shuma që e kemi ndarë si ministri, nuk mjafton për të mbuluar shpenzimet e atyre që studiojnë në universitetet jashtë Kosovës, por kjo ka qenë për shkak të një motivimi”, tha ajo.
Në anën tjetër, njohësi i çështjeve të arsimit, Rinor Qehaja tha për Radio Kosovën, se skema të tilla që përkrahin të rinjtë janë të rëndësishme, pasi kontribuojnë drejtpërdrejt në mirëqenien e tyre.
Ai tha se duhet të rritet buxheti për të mbështetur studentët.
“Ajo që do të doja të shihja është padyshim një buxhet të rritur për përkrahje për bursa për studentët që studiojnë në universitetet prestigjioze botërore. Në të njëjtën kohë duhet të ketë një kufizim për këtë përkrahje, që është domosdoshmëri që këta studentë pas diplomimit të kthehen e të kontribuojnë në sferat e ndryshme sipas fushës së studimeve, e që pastaj do të gjeneronte ndryshimin e pritur në vendin tonë”, tha ai.
Qehaja, theksoi se përveç mbështetjes për vajzat në fushën e teknologjisë e shkencës, mbështetje duhet të ketë edhe për fusha të tjera të studimit në institucionet publike dhe ato e private.
