Në një intervistë për transmetuesin kombëtar zviceran SRF, kryeministri i Kosovës, Albin Kurti, flet për tensionet me Serbinë për të cilat thotë se aktualisht i mbajnë “qytetarët në këmbë”. Sipas tij, Serbia është fajtore për situatën dhe Kosova nuk ka zgjidhje tjetër veçse të mbrojë integritetin territorial dhe sovranitetin e vendit kundër agresorit serb. Ai e sheh Kosovën shumë të orientuar drejt BE-së dhe NATO-s dhe thekson se sa i përket qëndrimit të perëndimit nuk ka rrugë të mesme.
SRF: Kryeministër, tensionet në Kosovë janë rritur muajt e fundit. Kush e ka fajin për këtë?
Kurti: Epo, Serbia mban 48 baza operacionale përpara rreth kufirit të Kosovës në afërsi prej më pak se pesë kilometra. Nga këto baza 28 janë ushtarake, 20 janë zona xhandarmërish. Pra, gjendja nuk është aq e mirë sa i përket marrëdhënieve tona, sepse ata po na provokojnë gjatë gjithë kohës dhe duan ta bëjnë Kosovën në një gjendje jofunksionale dhe po bëhen gjithnjë e më nervozë sepse ne jemi të suksesshëm.
SRF: Por diplomatë nga BE dhe nga SHBA kritikuan gjithashtu mosgatishmërinë tuaj për kompromis. Kjo është ajo që ne dëgjojmë. A i hidhni edhe benzinë zjarrit?
Kurti: Kam qenë parimor për të mbrojtur integritetin territorial, sovranitetin dhe demokracinë e vendit. Ne jemi një shtet i ri, popull i lashtë dhe nuk mund të heqim dorë nga funksionaliteti i shtetit tonë dhe në të njëjtën kohë nga integriteti territorial dhe integriteti i kufijve.
SRF: Si është e mundur që diplomatët nga BE-ja dhe ne, aleatët tuaj më të ngushtë, po kritikojnë gjithashtu këndvështrimin tuaj?
Kurti: Epo, kjo është shumë rrallë, duhet të them. Por për të tërhequr Serbinë drejt Perëndimit, ata ndonjëherë preferojnë të gjejnë një rrugë të mesme. Por, nga tensionet që kemi pasur kohët e fundit, është e qartë se nuk mund të ketë neutralitet, nuk mund të ketë rrugë të mesme mes zjarrit dhe zjarrfikësve. Kështu që unë mendoj se duhet t’i përmbahemi vlerave. Kosova është pro-evropiane. Kosova dëshiron të anëtarësohet në BE dhe NATO dhe Kosova është progresive dhe demokratike.
SRF: Por për të bërë një marrëveshje me Serbinë, duhet të bëni kompromis. Çfarë jeni të gatshëm t’i jepni Serbisë?
Kurti: Duhet të kemi një marrëveshje për normalizimin e marrëdhënieve, por nuk mund të shpikim një makinë kohe dhe të kthehemi prapa. As para 1999 kur u çliruam, as para 2008 kur shpallëm pavarësinë. Pra, duhet njohje reciproke mes Kosovës dhe Serbisë. Nuk po them se ky është pika e vetme e marrëveshjes së ardhshme, por është pika qendrore.
