Lideri i lëvizjes Dveri dhe deputeti Boshko Obradoviq tha për agjencinë Beta se pas deklaratave të fundit të zyrtarëve evropianë, është e qartë se rruga e mëtejshme e Serbisë drejt BE-së kushtëzohet nga njohja e shtetit të Kosovës dhe heqja dorë nga një “pjesë e territorit kombëtar”.
Ai vlerësoi se është koha e duhur që Serbia të mos merret me iluzionin e quajtur anëtarësim në Bashkimin Evropian dhe të kthehet në bashkëpunim normal bilateral me BE-në, i cili do të jetë në interes të dyanshëm.
Obradoviq deklaroi se i është shumë mirënjohës Manuel Saracin, të dërguarit special të Gjermanisë për Ballkanin Perëndimor, si dhe kancelarit gjerman Olaf Scholz, që kanë thënë hapur se rruga e ardhshme e Serbisë drejt BE-së kushtëzohet me heqjen dorë nga një pjesë e territorit të shtetit.
