Pentagoni planifikon një rritje gjashtëfish të prodhimit të predhave të artilerisë, një pjesë e konsiderueshme e të cilave synohet për furnizime në Ukrainë, raporton The New York Times , duke cituar një raport nga Komanda e Ushtrisë Amerikane.
Para pushtimit rus të Ukrainës, fabrikat ushtarake amerikane prodhonin 14,400 predha artilerie në muaj. Pentagoni planifikon të rrisë prodhimin në 90,000 predha në muaj brenda dy viteve. Tashmë janë lidhur kontratat përkatëse me kompani private.
Ky numër predhash nuk është prodhuar në Shtetet e Bashkuara që nga Lufta Koreane. Agresioni i Rusisë kundër Ukrainës, gjatë të cilit çdo muaj konsumohen dhjetëra mijëra predha nga të dyja palët, ka bërë që ushtria amerikane të kuptojë se kapaciteti aktual për prodhimin e municioneve nuk është i mjaftueshëm.
Bëhet fjalë për predha 155 mm me rreze të gjatë veprimi. Tani ato prodhohen në gjashtë fabrika shtetërore nga kompani private sipas kontratave me Pentagonin. Sipas The New York Times, pajisjet në këto fabrika janë të vjetruara, disa nga ambientet janë përdorur për prodhimin e predhave gjatë Luftës së Dytë Botërore. Në nëntor, Pentagoni i dha General Dynamics një kontratë për të ndërtuar një linjë të re prodhimi të predhave në një fabrikë në Teksas.
Pritet që pothuajse të gjitha produktet e këtyre fabrikave të dërgohen në Ukrainë. Siç thekson gazeta, vendimi për të rritur ndjeshëm prodhimin e predhave tregon gatishmërinë e Shteteve të Bashkuara për të mbështetur Ukrainën gjatë një lufte të zgjatur me Rusinë./Kosovatimes/
