Një banor i Gjermanisë, emri i plotë i të cilit nuk u bë i ditur, u ndalua në aeroportin e Mynihut të dielën dhe u arrestua të nesërmen me dyshimin për spiunazh për Rusinë. Kështu ka bërë të ditur të enjten prokuroria federale në Gjermani.
Arrestimi lidhet me një hetim spiunazhi nga Shërbimi Federal i Inteligjencës Gjermane BND. Pretendohet se i dyshuari i ka dhënë një prej shërbimeve speciale ruse informacionin e marrë nga oficeri i BND i arrestuar më parë.
Nga mesazhi i prokurorisë rezulton se shtetasi gjerman Artur E., i arrestuar të hënën, nuk ishte anëtar i inteligjencës gjermane, por vepronte si korrier. Nuk jepen detaje të tjera të rastit.
I akuzuari është ndaluar pas mbërritjes nga Shtetet e Bashkuara. Në operacion morën pjesë punonjës të Byrosë Federale të Hetimeve të SHBA-së.
Në dhjetor, një punonjës i Shërbimit Federal të Inteligjencës u arrestua në Gjermani i dyshuar për spiunazh për Rusinë. Para kësaj, rasti i fundit i zbulimit të një agjenti të dyfishtë në Gjermani ka ndodhur në vitin 2014. Më pas një oficer i huaj i inteligjencës u arrestua për përcjelljen e informacionit të klasifikuar në Shtetet e Bashkuara dhe ofrimin e shërbimeve të tij në Rusi.
