Ministri i Financave, Hekuran Murati tha se kësaj qeverie nuk mund t’i mëveshët përgjegjësia për rritjen e tatimit në pronë, sepse vendimi për rritje 100 për qind është marrë nga ish Qeveria Mustafa dhe është ekzekutuar nga ajo Haradinaj. Sipas tij, vetëm hyrja në fuqi po ndodhë tash, ndërsa përgjegjësitë duhet kërkuar nga ata të mëparshmit.
Këto komenete ministri Murati i bëri të premten në një konferencë për media. Ai pavarësisht insistimit të gazetarëve, nuk e tregoi vlerën e koeficientit për pagat, duke i dhënë prioritet rritjes së tatimit në prona. Murati tha se pjesa më e madhe e këtij tatimi krijohet nga tatimi i tokave.
Ndërsa duke dhënë detaje për procedurat e rritjes së tatimit, Murati tha se Ligji për Tatimin në Pronë ka hyrë në fuqi më 26 janar të vitit 2018, ndërsa është parashikuar që zbatimi i tij të ndodhë pas 5 vitesh, që i bije pikërisht në fillim të vitit 2023.
“Në vitin 2018, Ligji për Tatimin në pronë ishte miratuar nga Qeveria Mustafa, më 4 maj 2017 kur ministër i Financave ka qenë Avdullah Hoti. Ky ligj nuk arriti të miratohej në Kuvend dhe të hyjë në fuqi sepse Qeveria kishte rënë, një javë më vonë. I njëjti ligj është proceduar në qeverinë Haradinaj dhe më 26 janar 2018 është publikuar në gazetën zyrtare. Ky ligj i ka caktuar disa afate dhe disa kushte që i obligojnë institucionet të respektohen. Sipas Ligjit, neni 7 ka paraparë që në vitin e 5-të të zbatimit të ligjit të hyjë në fuqi tatimi 100 për qind i tokave”, ka thënë Murati.
