Kryetari i Partisë Socialdemokrate, Fardan Molliqaj, duke iu referuar një lajmi të transmetuar sot në media, ku citohet një raport i ambasadorit të Kosovës në ShBA, se kemi situatë të rënduar me aleatin tonë kryesor Amerikën, ka thënë se gjendja e ambasadës tonë në Uashington DC është pasqyrë e qeverisjes Kurti.
Molliqaj, përmes një postimi në Facebook, ka thënë se “Dugolli [ambasadori i Kosovë në SHBA] njofton nga Uashingtoni për një situatë tejet të rënduar me Shtetet e Bashkuara, ‘brutale’ e paska quajtur”.
“Kemi prishje raportesh me aleatë, por do ta kemi edhe Asociacionin drejt autonomisë. Ndërkohë, asnjë shenjë drejt mirëqenies e zhvillimit”, ka shkruar Molliqaj, transmeton Telegrafi.
Ai thotë se “gjendja e ambasadës tonë në Uashington DC është pasqyrë e qeverisjes Kurti. As nuk shpenzohet për projekte, as nuk shpërndahet për mirëqenie. Ndërkohë, ambasadat janë pa staf. Mendësia është feudale: kursimi krijon fitim. Ka mbetur veç t’i kthejnë paratë në flori dhe t’i mbjellin në tokë për shumim”.
“Sikur me targat dhe shtyrjen e zgjedhjeve, edhe deklaratat kundër për Asociacionin janë strategji e marrëdhënieve me publikun. Deklaratat nxisin tension e frikë, publiku këtu është në ankth, përpara se gjithçka të pranohet, pa u kuptuar tamam çfarë u pranua. Prodhimi i një rreziku është mbrojtje për kompromiset. Kurti po i shantazhon njerëzit. Frika, tash sa kohë është mjeti i tij për ta shitur kompromisin. Përndryshe do të jepte dorëheqje”.
“Kjo qasje përveç që e dëmton rëndë Kosovën së brendshmi, as marrëdhëniet me aleatet nuk do t’i kthejë në pikën e mëparshme”, ka shkruar Molliqaj. /Kosovatimes/
