Një asociacion monoetnik i komunave me shumicë serbe në Kosovë do të nënkuptonte vdekjen e ngadaltë të demokracisë liberale më të gjallë të Ballkanit Perëndimor, përkatësisht Republikës së Kosovës. Një konstatim të tillë e ka dhënë në një shkrim autorial studiuesi i filozofisë, Gent Carrabregu, i cili aktualisht është ligjërues në “Duke University” në SHBA.
Sipas tij një asociacion tillë do të ishte një variant i Republika Srpskas në Bosnje dhe Hercegovinë.
“Prandaj, do ta bënte Republikën e sapolindur të Kosovës një shtet jofunksional të kontrolluar nga Beogradi, duke mbjellë kështu farën e një lufte të re në Ballkan. Prandaj është qeveria e ekstremit të djathtë në Beograd që kërkon një asociacion të tillë, jo komuniteti serb në Kosovë. Ajo gjithashtu nënvizon se një asociacion i tillë monoetnike do të promovonte pa dashje agjendën globale të alt-right-s, duke mbështetur idenë e etnokracisë dhe kundër demokracisë liberale multikulturore. Unë besoj se ne nuk kemi nevojë për këtë në një moment të ndjeshëm gjeopolitik siç është ky i yni, kur demokracia liberale është tashmë nën një presion të madh në mbarë botën”, ka thënë Carrabregu.
Tutje ai ka thënë se teksa procesi i negociatave për normalizimin e marrëdhënieve ndërmjet Republikës së Kosovës dhe Republikës së Serbisë po hyn në një fazë kritike, bashkësia ndërkombëtare duhet të mendojë dy herë para se të përpiqet t’ia fusë asociacionet etnokratike në fyt lidershipit kosovar.
“Është krejtësisht e paarsyeshme të bësh presion mbi një lider popullor, vërtet evropianist dhe socialdemokrat siç është kryeministri Albin Kurti për të përmbushur kërkesat e padrejta të Beogradit. Në vend të kësaj, duhet të bëhet presion ndërkombëtar ndaj qeverisë së Serbisë për të njohur shtetësinë e Kosovës. Kjo është e vetmja rrugë e qëndrueshme drejt paqes afatgjatë në Ballkan”, ka nënvizuar Carrabregu.
