Kryetari i Lidhjes Demokratike të Kosovës, Lumir Abdixhiku, tha se koeficienti në vlerë prej “vetëm 105 [euro] është goditje e radhës ndaj mjekëve, mësuesve, policëve, ushtarëve e gjithë shërbyesve publikë”.
“Është braktisje e njerëzve të vendit, që shkakton braktisjen e tyre të vendit”, ka shkruar ai në rrjetin social Facebook.
Qeveria e Kosovës, vendosi sot që vlera e koeficientit të pagave për vitin 2023 të jetë 105 euro.
Pagat e punëtorëve në Kosovë llogariten duke e shumëzuar koeficientin e pagës së një pozite me vlerën monetare të koeficientit. Raporti i koeficienteve është nga një deri në 18.
Abdixhiku tha se në krizën më të madhe ekonomike e sociale ndër vite, Qeveria “sërish tregoj pandjeshmëri”.
“Pandjeshmëri ndaj përballjes qytetare, ndaj rritjes së kostos së jetesës, ndaj vet njerëzve të këtij vendi”.
Ai tha se LDK-ja ka propozuar koeficient në vlerë prej 125 eurosh dhe se gjithçka më pak se aq është ulje e pagave për disa e mos-rritje për të tjerët.
“Është injorim i inflacionit e kushteve të rënduara të jetesës. Këtë propozim do të dërgojmë menjëherë edhe si amandament në Kuvend”, shkroi ai.
Ligji i ri i pagave në Kosovë do të hyjë në fuqi më 5 shkurt të këtij viti.
Ligji, i miratuar në dhjetor të vitit të kaluar, nuk e ka përfshirë vlerën e koeficientit, e cila përcakton një tavan deri ku mund të paguhet një punonjës i shtetit. Ai u përcaktua sot nga Qeveria e Kosovës dhe nuk do të jetë i pandryshueshëm. Nga janari i vitit tjetër ai do të jetë 110 euro.
Numri i punonjësve që marrin paga nga buxheti i Kosovës është rreth 83 mijë.
