Shefja e Grupit Parlamentar të Lëvizjes Vetëvendosje, Mimoza Kusari-Lila, ia ka bërë me dije me një postim në Twitter, të emëruarit të posaçëm të BE-së për dialogun Kosovë-Serbi, Miroslav Lajçakut si edhe shefit të tij, Përfaqësuesit të Lartë të BE-së për Politikë të Jashtme, Josep Borrell, qëndrimin që presidenti i Serbisë, Aleksandar Vuçiq, ka ndaj kryeministrit të Kosovës, Albin Kurti.
Duke publikuar një pjesë të fjalimit të Vuçiqit në Parlamentin e Serbisë, të mbajtur dy ditë më parë, e ku debatohej për Kosovën, kreu i shtetit serb, duke sulmuar ish presidentin e Jugosllavisë, Vojislav Koshtunica, ia rikujton atij se është ai që e ka liruar nga burgu si i burgosur politik, Albin Kurtin.
“Presidentit të Serbisë i vjen keq në Parlamentin serb se pse ish-presidenti i Republikës Federative të Jugosllavisë, e liroi atëherë të burgosurin politik, tani kryeministrin e Kosovës Albin Kurti, nga burgu”, shkruan Kusari-Lila.
“Putini në Rusi dhe Vuçiqi në Serbi, në mënyrë të ngjashme duan që kundërshtarët e tyre politikë të jenë në burg”, shkruan ajo.
Në video shihet kur Vuçiq e sulmon opozitën në Serbi, me një dokument që sipas të cilit është nënshkruar nga Koshtunica e ku Kurti është liruar, duke shprehur në këtë mënyrë keqardhjen se përse Kurti është liruar atëherë nga burgu ku mbahej si i burgosur politik.
