Pas pranimit në parim nga ana e Kosovës propozimin e BE-së për marrëveshjen me Serbinë, ka reaguar partia opozitare LDK.
LDK përsërit edhe njëherë qëndrimin e saj, të marrë më datë 16 janar në mbledhjen e Kryesisë Qendrore mbi procesin e dialogut.
“Për LDK-në, Kosovës nuk i duhet një marrëveshje bazë që nuk përmban njohjen. Vendit tonë i duhet një marrëveshje përfundimtare që në thelb ka njohjen e ndërsjellë ndërmjet dy vendeve – si shtete të pavarura e sovrane”, thuhet në komunikatë.
Sipas kësaj partie, çdo devijim nga ky orientim strategjik është përgjegjësi e pariparueshme e qeverisë aktuale.
Në komunikatë thuhet se LDK kërkon raportim të kryeministrit në Kuvendin e Kosovës mbi procesin e dialogut, ngase, sipas LDK-së, injorimi i institucionit të përfaqësuesve të popullit nuk i jep legjitimitet asnjë procesi jetik për vendin. /Kosovatimes/
