Gati një vit pas fillimit të pushtimit rus të Ukrainës, shumica dërrmuese e amerikanëve vazhdojnë të mbrojnë çdo lloj ndihme për Ukrainën në luftën e saj për të rifituar territorin ukrainas të pushtuar nga Rusia, edhe nëse kjo çon në një luftë të zgjatur. Këtë e dëshmojnë rezultatet e një sondazhi të kryer nga Instituti Gallup .
Ndërsa 65 për qind e të anketuarve ishin në favor të mbështetjes së plotë për Ukrainën, 31 për qind besojnë se SHBA duhet të bëjë përpjekje për t’i dhënë fund luftës sa më shpejt të jetë e mundur, edhe nëse kjo do të thotë të mbajë një pjesë të territoreve të pushtuara nën kontrollin rus. Këto rezultate janë pothuajse identike me rezultatet e një sondazhi të kryer gjashtë muaj më parë. Niveli më i lartë i mbështetjes – 81 përqind – në mesin e demokratëve, megjithëse një shumicë e konsiderueshme e republikanëve dhe të pavarurve gjithashtu mbështesin vazhdimin e ndihmës për Ukrainën.
Pas sulmit rus në Ukrainë, vëllimi i ndihmës ushtarake amerikane për Kievin arriti në 27 miliardë dollarë, dhjetëra miliarda u ndanë për ndihmë ekonomike dhe humanitare. 39 për qind e të anketuarve e quajtën atë një nivel adekuat të mbështetjes, 30 për qind ishin në favor të rritjes së ndihmës, 28 për qind besojnë se është e tepruar.
Rezultatet e një sondazhi të porositur nga kompania televizive Foxnews dëshmojnë gjithashtu për mbështetjen e qëndrueshme të Ukrainës nga amerikanët . 51 për qind e të anketuarve besojnë se Ukraina po e fiton luftën me Rusinë, 64 për qind janë në favor të vazhdimit të furnizimit me armë në Kiev, 63 për qind janë në favor të ndihmës financiare për Ukrainën.
