Kryetari i Kuvendit të Kosovës, Glauk Konjufca, me rastin e 16-vjetorit të vrasjes së Mon Balajt e Arben Xheladinit, ka thënë se vendosja drejtësisë mbetet kërkesë e tyre parësore.
“Vitet nuk e zbusin dhimbjen për këta pishtarë të guximit, idealizmit të virtytshëm dhe aktivizmit qytetar të pathyeshëm. As zemërimin e pafund për drejtësinë e munguar ndaj atyre që kryen aktin mizor dhe u arratisën nga vendi i krimit. Vendosja e drejtësisë dhe dënimi i autorëve të krimit të 10 shkurtit 2007 mbetet kërkesë jona parësore. Sepse, siç thuhet, kur padrejtësia qesh në tryezë, drejtësia qan pas porte”, shkroi Konjufca në Facebook, duke shtuar se janë duke ecur drejt asaj porte.
Sipas tij, Arben Xheladini dhe Mon Balaj ranë dëshmorë në mbrojtje të vlerave të lirisë, barazisë, demokracisë dhe për vetëvendosjen e Republikës.
“Lavdi jetës dhe veprës së dëshmorëve të demokracisë Arben Xheladini e Mon Balaj!”, shkroi Konjufca.
Balaj e Xheladini u vranë me plumba gome nga policë rumunë që vepronin në kuadër të Misionit të Kombeve të Bashkuara në Kosovë (UNMIK), më 10 shkurt 2007, në protestën e Lëvizjes Vetëvendosje, duke e kundërshtuar pakon e Ahtisaarit dhe negociatat me Serbinë. /Kosovatimes/
