Dita e 14 marsit do të jetë festival i matematikës për herë të parë edhe në Kosovë. Instituti për Promovimin e Metodës Shkencore dhe Shtëpia Botuese “Dukagjini” janë bashkuar për të shënuar “Ditën e Matematikës”.
Qëllimi i këtij aktiviteti është që të rritet hapësira publike ku diskutohet për matematikën, për shkencat dhe për arsimin në Kosovë. Po ashtu, qëllimi është që të përfshihen, në mënyrë konkrete, të gjitha grupmoshat në aktivitete që festojnë për matematikën, e nënvizojnë rëndësinë e saj dhe e promovojnë mësimdhënien dhe mësimnxënien e saj.
Aktiviteti synon si audiencë publikun e gjerë, me fokus ata që janë të lidhur me arsimin, përfshirë mësimdhënësit dhe nxënësit, si dhe prindërit e nxënësve.
Janë së paku pesë aktivitete të veçanta që do ta shënojnë “Ditën e Matematikës”, e për të cilat e ftojmë publikun që të marrë pjesë.
Fillimisht, ftojmë të gjithë qytetarët pa dallim, nga të gjitha moshat, që me një ese deri në 600 fjalë të përshkruajnë përvojën e tyre me matematikën. E hapur për të gjithë është edhe thirrja për një video njëminutëshe, me temën “Sikur të isha mësimdhënës, ja si do ta shpjegoja matematikën”). Esetë dhe videot do të pranohen deri më 7 mars 2023, në orën 16:00, në adresën ditaematematikes@gmail.com. Ndonëse nuk bëhet fjalë për garë, por për një festival, organizatorët kanë planifikuar që të ndajnë nga tri shpërblime, me vlerë prej 200, 150 dhe 100 euro për tri kontributet e përzgjedhura nga një komision profesional për ese dhe për videot më të mira.
Nxënësit e shkollave pjesëmarrëse (klasat VI-IX, shkollat “Ismail Qemali”, “Hasan Prishtina”, “Dardania”, “Meto Bajraktari”, “Shkëndija” si dhe Gjimnazi i Specializuar Matematikor) do të punojnë vepra arti (vizatime, piktura, ose ndonjë konstruksion) lidhur me matematikën ose inspiruar nga matematika.
Video deri në 1 minutë do të përgatitin edhe mësimdhënësit e matematikës, ku do të tregojnë se pse e kanë zgjedhur profesionin e tyre si matematikanë.
Festivali për “Ditën e Matematikës” do të mbahet në ambientet e Gjimnazit të Specializuar Matematikor, në Prishtinë.
Ndryshe, në ShBA, qe një kohë 14 marsi shënohet si Dita e Numrit π (pi). Arsyeja pse pikërisht kjo datë ishte zgjedhur ka të bëjë me vlerën e përafërt (3.14) të numrit π si dhe faktit që në ShBA datat shënohen duke e shkruar së pari muajin (3) e pastaj ditën (14) . Në vitin 2019, UNESCO-ja e miratoi 14 marsin si Ditën Ndërkombëtare të Matematikës.
Në Kosovë, aktiviteti organizohet nga Instituti për Promovimin e Metodës Shkencore dhe Shtëpia Botuese “Dukagjini”, përkrahur nga Drejtoria Komunale e Arsimit në Prishtinë. /Kosovatimes/
