Sibel Halimi, zëdhënëse e LDK-së, komentoi pretendimet dhe akuzat e deputetit Haki Abazi, në lidhje me rastin e Astrit Deharit.
Halimi deklaroi se është alarmuese “implikimi i kryeministrit” në rastin e zhdukjes së mostrave të Deharit.
“Në këtë kohë, kur Kosova është duke u ballafaquar me kriza të ndryshme e pa asnjë veprim konkret në zgjidhjen e tyre nga ana e qeverisë, është tepër shqetësuese se si deputeti i partisë në pushtet sot na del me informata tronditëse”, deklaroi Halimi.
“Posaçërisht është alarmuese edhe implikimi i vet kryeministrit të vendit në rastin e zhdukjes së mostrave të Astrit Deharit”. Ajo ka kërkuar veprim të menjëhershëm nga prokuroria.
“Ndaj, kërkojmë urgjentisht veprimin e menjëhershëm të Prokurorisë në hetimin dhe zbardhjen e së vërtetës, rasti i tillë i ndjeshëm nuk duhet të mbetet i izoluar nga makineria propagandistike ashtu siç edhe dinë ta bëjnë kjo parti”, ka shkruar Halimi.
Deputeti i LVV-së, Haki Abazi, në konferencë për media, sot deklaroi se në lidhje me këtë cështje “Mendoj që prokuroria duhet ta marrë në pyetje kryeministrin Kurti, Dejona Mihalin, Albulena Haxhiun, Nazlie Balajn dhe Flutura Gogaj Bajramin”.
