Një raketë izraelite goditi një ndërtesë në Kafr Sousa, një lagje qendrore e Damaskut pranë një kompleksi të madh dhe të ruajtur fort të inteligjencës dhe selisë së organizatave iraniane, herët të dielën, duke vrarë 15 persona, thanë dëshmitarët dhe zyrtarët.
Sulmi në shënjestër dëmtoi disa ndërtesa në një pjesë me popullsi të dendur të qytetit, jo shumë larg sheshit Omajad. Sipas një burimi në ushtrinë siriane, Izraeli qëlloi me raketa të shumta në disa zona të qytetit pas mesnate.
Pesëmbëdhjetë persona u vranë, 15 u plagosën dhe disa ndërtesa u dëmtuan.
Ky është “sulmi më vdekjeprurës i Izraelit në kryeqytetin sirian” deri më tani, tha për AFP Rami Abdel Rahman , kreu i Observatorit Sirian për të Drejtat e Njeriut.
Observatori Sirian (OSDH) është një organizatë joqeveritare me një rrjet të gjerë burimesh në Siri.
Për momentin nuk dihet nëse objektivi ka qenë një person konkret.
Gjegjësisht, në bombardimin e Kafr Sousa-s në vitin 2008, u vra Imad Mougnijeh, atëherë komandanti suprem i grupit pro-iranian Hezbollah. Distrikti është shtëpia e disa agjencive iraniane të sigurisë dhe një qendër e madhe kulturore iraniane.
Për 10 vitet e fundit, Izraeli ka kryer sulme ajrore mbi dërgesat e armëve nga Irani dhe vendosjen e personelit ushtarak iranian në Sirinë fqinje.
Sipas burimeve të inteligjencës perëndimore, ka disa mijëra anëtarë të milicive të ndryshme dhe grupeve paraushtarake lokale nën komandën e Iranit në Siri.
Milicitë pro-iraniane, të udhëhequra nga Hezbollahu i Libanit, kanë ndikim të rëndësishëm në zona të mëdha të Sirisë lindore, jugore dhe verilindore dhe në disa periferi të vetë Damaskut.
Qeveria e presidentit sirian Bashar al-Assad kurrë nuk ka njoftuar publikisht se forcat iraniane po veprojnë në emër të tij në luftën civile siriane.
Assad pretendon se Teherani ka vetëm këshilltarë ushtarakë në Siri
