Maslichenko, shtetas i Ukrainës me përvojë në financime të gjelbra, do të jetë i vendosur në Prishtinë
BERZh-i ka emëruar Sergiy Maslichenko si Drejtor i Asociuar, Udhëheqës për Kosovën, duke filluar nga 20 shkurti 2023.
Sergiy do të jetë i vendosur në Prishtinë dhe do të drejtojë operacionet e Bankës në Kosovë, ku BERZh-i ka investuar pothuajse 600 milionë euro që kur u bë vend i operacioneve në vitin 2012.
Sergiy Maslichenko ka punuar për BERZh-in në Kiev, Ukrainë, në vitet 2007-2019 në fushën e efiçiencës së energjisë dhe ndryshimeve klimatike, duke menaxhuar reformën e politikave dhe projektet e investimeve. Në dy vitet e tij të fundit në këtë departament, ai shërbeu si drejtor i bordit të Fondit të Gjelbër për Rritje. Në periudhën 2019-2020 ka shërbyer si Zëvendës Ministër i Energjisë dhe Mjedisit i Ukrainës, dhe më vonë ka themeluar dy platforma financimi për klimën.
Kthimi i Sergiy në BERZh dhe emërimi në Kosovë vijnë në kohën kur investimet e Bankës në Kosovë po fokusohen gjithnjë e më shumë në energjinë e gjelbër dhe dekarbonizimin e ekonomisë. Vitin e shkuar, 80 për qind e investimeve vjetore të Bankës, që kapën vlerën 91 milionë euro, ishin të dedikuara për energji të gjelbër, efiçiencë të energjisë në ndërtesa, linja të kreditit për NVM për investime në efiçiencën e energjisë dhe projekte të tjera të tranzicionit me karbon të ulët.
Së fundi, rreth një e treta e konsumit të përgjithshëm në Kosovë plotësohet nga energjia e ripërtërishme, duke përfshirë hidro, erë dhe solar, dhe biomasë.
Sergiy Maslichenko tha: “Jam shumë i nderuar të udhëheq punën e rëndësishme të BERZh-it në Kosovë – një vend i ri me potencial të lartë. Mezi pres të punoj së bashku me Qeverinë e Kosovës, komunitetin e biznesit dhe shoqërinë civile për të mbështetur rritjen ekonomike të vendit, ndërtimin e një ekonomie të gjelbër dhe reziliente dhe forcimin e integrimit rajonal dhe investimeve të huaja.”
Udhëheqësi i mëparshëm i BERZh-it në Kosovë, Neil Taylor, i cili e mbajti këtë pozitë për pesë vjet, ka kaluar në një pozitë në selinë e BERZh-it në Londër duke u fokusuar në transformimin organizativ.
Strategjia aktuale e BERZh-it për Kosovën, e miratuar në janar 2022, fokusohet në zhvillimin e sektorit privat, kalimin në ekonominë e gjelbër dhe forcimin e integrimit dhe lidhshmërisë rajonale. /Kosovatimes/
