Tomas Szunyog, Shefi i Zyrës së Bashkimit Evropian në Kosovë, përmes një postimi në Twitter ka përgëzuar Kosovën për ratifikimin e tri marrëveshjeve ndërkombëtare që janë derivat i Procesit të Berlinit.
“Urime Kosovës që ratifikoi ndër të parat tre marrëveshjet e Procesit të Berlinit me një mbështetje të madhe në Kuvend” ka shkruar Szunyog në Twitter.
Szunyog ka thënë se këto tre marrëveshje ndërkombëtare do të mundësojnë lëvizjen e lirë me letërnjoftime dhe njohjen e kualifikimeve të arsimit të lartë dhe kualifikimeve profesionale brenda Ballkanit Perëndimor.
“Ratifikimi i sotëm është një hap i rëndësishëm për Procesin e Berlinit, Tregun e Përbashkët Rajonal dhe përmirësimin e marrëdhënieve të mira fqinjësore. Është një shenjë e qartë e përkushtimit të Kosovës për të ecur përpara në rrugën e saj të integrimit evropian”, ka shtuar Szunyog.
Ndryshe sot Kuvendi i Kosovës miratoi ratifikimin e Marrëveshjes për lëvizjen e lirë me letërnjoftime në Ballkanin Perëndimor, marrëveshjen për njohjen e kualifikimeve të arsimit të lartë në Ballkanin Perëndimor si dhe njohjen e kualifikimeve profesionale të mjekëve, stomatologëve dhe arkitektëve në kontekstin e Marrëveshjes së Tregtisë së Lirë të Evropës Qendrore.
Poashtu edheAmbasadori i Gjermanisë në Kosovë, Jorn Rohde ka përgëzuar të enjten Kuvendin e Kosovës për ratifikimin e tri marrëveshjeve të mobilitetit që dalin nga Procesi i Berlinit.
Në një postim në Twitter, Rohde ka shkruar se këto marrëveshje do të sjellin përfitime konkrete për qytetarët e Kosovës dhe do të nxisin masivisht integrimin rajonal.
Ambasadori Rohde ka shtuar më tej se Procesi i Berlinit po tregon rezultate.
“Mirënjohje Kuvendit të Kosovës që ratifikoi kaq shpejt tre marrëveshjet e mobilitetit. Ato do të sjellin përfitime konkrete për qytetarët e Kosovës, do të nxisin masivisht integrimin rajonal të gjashtë vendeve të Ballkanit Perëndimor dhe do t’i sjellin ata një hap më afër BE-së. Procesi i Berlinit po tregon rezultate!”, ka shkruar Rohde.Marrëveshjet për njohjen reciproke të letërnjoftimeve, diplomave universitare dhe kualifikimeve profesionale, ishin nënshkruar nga krerët e gjashtë vendeve të Ballkanit Perëndimor, më 3 nëntor, në samitin në kuadër të Procesit të Berlinit.
